Renditja e Superiores/ Ka garë vetëm për Ligën e Konferencës dhe për play-out, ja situata pas javës së 28

11 Prill 2022, 15:05, Sport CNA

Ndeshja e sotme mes Dinamos dhe Kastriotit ka mbyllur javën e 28 të Kategorisë Superiore, e cila ka bërë edhe më të qartë rrugëtimin e skuadrave dhe garën që ka mbetur në ndeshjet deri në mbyllje të këtij edicioni.

Me titullin e rënien që përtej ndonjë mrekullie duken të vendosur, diskutimi tani është vetëm për Ligën e Konferencës dhe për vendin që të çon në play-out me skuadrën nga Kategoria e Parë.

Tirana ka një avantazh prej 16 pikësh në kreun e renditjes dhe tani i mjaftojnë 3 fitore për të siguruar edhe matematikisht trofeun. Pas krahëve të saj, lufta është për dy vendet që të çojnë në Ligën e Konferencës. Nga Laçi i vendit të dytë, deri te Vllaznia e vendit të pestë, të gjithë janë në lojë për të arritur këtë objektiv që duket se do të sigurohet nga ndeshjet direkte.

Më pas vijon grupi prej tre skuadrash, ku janë Kastrioti, Teuta dhe Egnatia të cilat diskutojnë mes tyre për të evituar vendin e 8 që të çon në play-out, për të shmangur çdo rrezik të mundshëm për rënien.

Kurse Dinamo me 8 pikë diferencë nga ky vend i 8 dhe Skënderbeu me 11 pikë, duket se kanë prerë biletën për kthimin në Kategorinë e Parë.

JAVA 28
Të shtunën
Kukësi-Egnatia 1-1
Partizani-Teuta 3-1
Vllaznia-Laçi 0-0

Të dielën
Skënderbeu-Tirana 0-4

Të hënën
Dinamo-Kastrioti 0-1