Skënder Gega karikon lojtarët: Jemi në lojë, është mision i mundur

25 Mars 2022, 13:14, Sport CNA

Skënderbeu i Gegës nisi përgatitjet për ndeshjen e radhës në kampionat, që do të luhet pas një jave përballë Teutës në transfertë. Pas dy ditëve pushim, trajneri bardhekuq ka vendosur të mbledhë të tijtë për të pasur më shumë kohë përgatitjeje. Në kushtet në të cilat ndodhen bardhekuqtë, duket e pashmangshme që në çdo ndeshje të luajnë për fitore.

Pikërisht kjo situatë ka shtyrë trajnerin e Skënderbeut të mundohet të mbajë lart anën psikologjike të ekipit, sidomos pas dy barazimeve ndaj ekipeve, që ndodhen në pjesën e sipërme të renditjes. Duke përfituar nga kjo situatë dhe mbi të gjitha nga loja që ekipi ka zhvilluar në ndeshjen e fundit, trajneri Skënder Gega është ndalur më së shumti tek aspekti psikologjik i ekipit në daljen e parë për përgatitjen e ndeshjes me Teutën.

Në takimin me ekipin, Gega ka menduar ta nisë me një analizë, duke u kujtuar të tijve se janë ende 30 pikë në lojë dhe në këto kushte nuk kërkon të dëgjojë nga askush fjalën mision i vështirë. Gega ka mbledhur ekipin rreth vetes duke tentuar ta motivojë për ndeshjen e radhës dhe punën që duhet të bëjnë çdo ditë në këtë javë pushimi. Trajneri ka treguar qetësi për të përcjellë siguri tek ekipi, por edhe i prerë në kërkesat e tij.

?Vijmë nga dy barazime, sidomos ky i fundit që na ka lënë shije të mirë të gjithëve për shkak të lojës së zhvilluar, por ne kemi mundësi të bëjmë shumë më shumë se kaq. Prandaj jam i qetë dhe dua të përcjell te ju këtë siguri dhe besimin se fundi do të jetë ndryshe nga sa mendojnë shumë njerëz. Janë edhe 10 javë nga fundi i kampionatit, që përkthehen në 30 pikë. Prandaj s?dua të dëgjoj nga askush fjalët mision i vështirë për t?u arritur. Jemi ende në lojë dhe do të luajmë der në fund. Situatat mund të ndryshojnë ndeshje pas ndeshjeje, prandaj dua impenjim dhe lojë si ajo që kemi zhvilluar ndaj Kukësit.

Përpara kemi ndeshje delikate, e di, por me dy fitore në dy ndeshjet e radhës situata ndryshon tërësisht. Le të luajmë si të barabartë me Teutën dhe Tiranën e të mundohemi të marrim pikët maksimale në këto dy takime. Më pas do të shohim që gjithçka do të jetë shumë herë me e qetë. Tani është koha për t?u përgatitur seriozisht për ndeshjen e radhës. Dua impenjim maksimal nga të gjithë, pasi deri tani kam dyshimet e mia. Duhet të jemi një trup dhe vetëm kështu ia dalim. Unë jam i qetë dhe i sigurt se do t?ia dalim, por më duhet që edhe ju të jeni në këtë lartësi nga ana psikologjike?, tha mes të tjerash Gega në takimin me ekipin./Panorama Sport