Volodimir Zelenski, nga aktor humori në një figurë të admiruar

12 Mars 2022, 20:55, Kosova & Bota CNA

Që kur forcat ruse filluan agresionin ndaj vendit të tij, presidenti ukrainas Volodimir Zelenski është shndërruar në një figurë të admiruar në skenën botërore.

Ndërsa dhjetëra mijëra trupa ruse shkojnë në Kiev dhe autoritetet ukrainase njoftojnë për një atentat të parandaluar për ta vrarë atë, zoti Zelenski ka premtuar se do të qëndrojë në kryeqytetin e Ukrainës.

Deri së fundmi, ish-aktori dhe komediani 44-vjeçar nuk ishte shumë i njohur jashtë vendit të tij të lindjes.

Ai u zgjodh në pranverën e vitit 2019 me 73% të votave, duke fituar ndaj ish-presidentit Petro Poroshenko.

Zgjedhja e tij ishte një rast ku arti imiton realitetin.

Para zgjedhjeve, ai ishte më i njohur për rolin e tij si mësues historie në një shkollë të mesme në serialin e suksesshëm televiziv “Shërbëtori i Popullit”, nga i cili u bë i famshëm. Ai u zgjodh president i Ukrainës pas një videoje virale ku ai shfaqej duke kritikuar ashpër korrupsionin e përhapur gjerësisht.

Në vitin 2018, zoti Zelenski u emërua nga një parti politike e sapoformuar që mbante të njëjtin emër si seriali i tij, për të kandiduar me një platformë kundër korrupsionit ? e ngjashme me atë të personazhit që ai interpretonte.

Prezantimi i parë i shumë amerikanëve me zotin Zelenski erdhi në vitin 2019, kur ai u vu nën presion nga presidenti i atëhershëm Donald Trump për të gjetur informacione dëmtuese mbi ish-nënpresidentin dhe kandidatin presidencial Joe Biden dhe djalin e tij Hunter.

Jeta e hershme

Presidenti ukrainas lindi në Kryvyi Rih, një qytet në një rajon rusishtfolës të Ukrainës jug-qendrore, i cili në atë kohë ishte pjesë e Bashkimit Sovjetik.

Zoti Zelenski, i cili është hebre, ka thënë se shumë familjarë të tij vuajtën pasojat tragjike të Holokaustit. Gjyshi i tij, të cilit iu vra i ati dhe tre vëllezërit nga nazistët, shërbeu në Ushtrinë e Kuqe gjatë Luftës së Dytë Botërore.

Volodimir Zelenski u martua me skenaristen Olena Kiyashko në vitin 2003. Ata kanë një vajzë 17-vjeçare dhe një djalë 8-vjeçar. Të tre besohet se janë në Kiev me zotin Zelenski.

Ai u diplomia për drejtësi nga Universiteti Kombëtar i Kryvyi Rih. Por në vend që të ndiqte një karrierë në drejtësi, ai iu kushtua komedisë dhe ishte një nga themeluesit e Kvartal 95, e cila u bë një kompani e suksesshme prodhimi televiziv.

Ndër arritjet e tij më të pazakonta ishte fitorja e tij në 2006 në versionin ukrainas të programit televiziv “Dancing with the Stars”.

Nga viti 2009 në 2018, ai interpretoi në një numër filmash, kryesisht komedi romantike.

Kur zoti Zelenski mori detyrën në vitin 2019, vendi i tij prej pesë vjetësh ishte përfshirë në një konflikt t me milicitë separatiste në Luhansk dhe Donetsk, dy provinca që përbëjnë rajonin e Donbasit.

Milicitë, me mbështetjen e Rusisë, kontrollonin pjesë të të dy provincave dhe shpesh shkëmbenin zjarr me trupat ukrainase. Përveç kësaj, Rusia vazhdonte të mbante në kontroll Krimenë, të cilën e aneksoi në vitin 2014.

Popullaritet i ulët

Megjithë mbështetjen mbarëbotërore që gëzon sot zoti Zelenski, popullariteti i tij ishte zbehur në mënyrë të konsiderueshme tek ukrainasit në vitet pas zgjedhjes së tij.

Në një vend ku korrupsioni mbetej një problem madhor, ai konsiderohej se nuk kishte bërë mjaftueshëm për të mbajtur premtimet e tij për të sjellë integritet në politikën e vendit.

Në janar, sondazhet tregonin se vetëm 30% e popullsisë e mbështeste atë.

Paralajmërimet për ndërhyrje

Në javët përpara sulmeve, zoti Zelenski shfaqi mosbesim ndaj informacioneve të zbulimit cës amerikane se presidenti rus Vladimir Putin ishte i vendosur të pushtonte Ukrainën.

Ai shpesh reagoi ndaj paralajmërimeve amerikane për një agresion të afërt me shprehje publike mosbesimi dhe madje ironie, ndërkohë që u përpoq të krijonte mbështetje mes udhëheqësve në Evropë dhe në mbarë botën, duke shpresuar se presidenti rus Putin do të detyrohej të tërhiqte trupat.

Kritikët kanë thënë se këmbëngulja e tij e shpeshtë se kërcënimet e presidentit Putin ishin një bllof, bëri që qytetarët e tij të ishin më pak të përgatitur sesa do të kishin qenë nëse ai do t’i kishte marrë seriozisht paralajmërimet.

Por thirrja e tij për bashkim të ukrainasve për t’iu kundërvënë agresionit rus ka fituar zemrat dhe mbështetjen e njerëzve në mbarë botën, të cilët besojnë se ai mishëron partinë e tij politike si një shërbëtor i popullit./voa