web counter
LEXO PA REKLAMA!

SHKARKO APP

App Store
Google Play

E fundit!

x

Të gjitha tiranitë janë të vdekshme!

2 Mars 2022, 13:49, Opinione CNA

Nga Grigels Muçollari

Koha për rithemelim!

?? janë simboli i fitores së njerëzve të lirë.

Të gjitha tiranitë janë të vdekshme. Ato japin frymën e fundit kur etja e madhe për liri na zgjidh duart që të luftojmë të keqen. Njerëzimi e ka njohur frikën para se ta mposhte atë. Është ndeshur trup më trup, jetë a vdekje, në kushte të pabarabarta.

Ne jetojmë në një vend të vogël dhe shumë herë jemi përplasur me interesat e fuqive të mëdha. Ashtu si ai fëmija i vogël që i hakërrehet më të madhit pa e menduar dy herë se kush është më i fortë, edhe ne shqiptarët, shpeshherë me atë kryelartësinë e popujve të vegjël, përlesheshim me sulltanë e despotë me ç’të kishim. Të fshehur nëpër male hidhnim gurë mbi pushtuesin që shkelte tokat tona.

Ne mund të ishim një kafshatë më shumë për perandoritë e botës por nuk e shuam etjen për liri. Mirëpo ne nuk mësojmë nga historia, e lëmë atë të përsëritet. Qëndruam të sunduar edhe për 5 dekada, a thua se 5 shekuj nuk mjaftonin. Sundimtari i fundit do të na shkulte me rrënjë nga Perëndimi, do të na mbyllte mendjen dhe gojën. As kjo nuk na e shuajti etjen për liri. Jo se ne jemi populli më liridashës i Europës, por liria është rruga e vetme për të jetuar. Brenda nesh frymon vetëdija se vetëm duke qenë të lirë mund të jetojmë pa frikë.

Sot ne jemi dëshmitarë se një vend më i madh se ne, por shumë herë më i vogël se një tjetër, ka zgjedhur të jetojë i lirë duke mposhtur frikën. Liria i jep vlerë të jetuarit, ndoshta sepse liria dhe jeta janë e njëjta gjë. Kemi shumë për të mësuar nga kjo që po ndodh në Ukrainë. Disa shtete reaguan pa frikë dhe e shpërfillën më të fortin, duke na dhënë besimin se Europa e Lirë dhe e Bashkuar, njohur ndryshe si Bashkimi Europian, po shkon drejt rithemelimit. Me lirinë në themel, shtëpia e përbashkët e europianëve, ka shansin të shndërrohet në një burim të gjithkohshëm frymëzimi, veçanërisht për ne popujt aspirantë. Bota e lirë reagoi kundër pushtimit rus të Ukrainës, sepse njerëzit që çmojnë lirinë e dinë mirë se çfarë sjellë mungesa e saj.

Mendja u çlirua nga frika dhe i la vend arsyes të flasë. Sheshet e Europës jehonin nga zërat kundër. Bashkimi Europian tejkaloi veten dhe reagoi me gjuhën e sanksioneve të ashpra, si e vetmja gjuhë që mund të kuptohet në Kremlin. Lufta në Ukrainë i dha një mundësi të artë Bashkimit Europian të rithemelohet. Lufta na rikujtoi qëllimin madhor përse BE është themeluar, për të mbrojtur paqen në Europë dhe harmoninë mes popujve. Europa e Lirë dhe e Bashkuar nuk duhet të jetë një iluzion për ne aspirantët.

Shqiptarët zgjodhën lirinë dhe Europën në vitin 1991. Kanë mundësi ta zgjedhin sërish, pa frikë, me shpresë./CNA.al





Lajmet e fundit nga