Fotot që shqetësojnë kryeministrin/ Lefter Koka në krahun e djathtë të Ramës në inceneratorin e Elbasanit

17 Shkurt 2022, 09:34, Aktualitet CNA

Ndër fotot që u shkrepën në ceremoninë e inaugurimit të inceneratorit të Elbasanit, në prill të 2017, Lefter Koka del herë në krahun e djathtë të Edi Ramës, herë në të majtin. Por kur flet për aferën e inceneratorëve, Edi Rama përdor disa shprehje ku bie në sy përpjekja për ta spostuar ish-ministrin. Nga krahu i djathtë, Lefter Koka del pas shpinës së kryeministrit. Një spostim që bie në sy, kur kryeministri flet për abuzuesit e aferës së inceneratorëve.

?Nëse në këtë punë të mirë ka pasur edhe individë që mbrapa shpinës së qeverisë, kanë abuzuar me pushtetin e tyre, për të nxjerrë përfitime të paligjshme, këtë e nxjerr hetimi dhe gjykimi i drejtësisë, jo propaganda politike apo balta mediatike!? shkruajti Rama në replika me një komentues në Facebook.

Por historia e kalimit të miliona eurove drejt kompanive të inceneratorëve tregon krejt të kundërtën. Afera nuk ishte një rast i izoluar i një ministri, as një episod i veçuar me përgjegjësi individuale. Vjedhja me inceneratorët përfshiu dikastere të ndryshme nga maja e piramidës shtetërore deri në kryebashkiakë dhe drejtorë drejtorish.

A e dinte shefi i qeverisë që Lefter Koka inicioi një afere korrupsioni? Apo ministri ia punoi pas shpine kryeministrit të ngratë? Ka disa momente që tregojnë se Rama nuk ishte aq i paditur.

Momenti i parë është dokumenti me firmën e vetë Edi Ramës, që është dorëzuar në SPAK nga kallëzimi i LSI-së. Kryeministri Rama ka firmosur për lejen e ndërtimit të inceneratorit të Elbasanit, në funksionin që mban si kryetar i Këshillit Kombëtar të Territorit. Në të janë edhe firmat e Lefter Kokës, edhe të Eglantina Gjermenit. Shkresa, sipas kallëzimit në SPAK, tregon se kryeministri ishte në dijeni të procedurave për ndërtimin e impiantit.

Momenti i dytë është shpejtësia me të cilën u vu në lëvizje qeveria në datën 16 dhjetor të vitit 2017. Brenda një dite u depozitua oferta e pakërkuar nga një kompani anonime për inceneratorin e Elbasanit. Po atë ditë u hartua kontrata 40 faqe dhe që u firmos brenda ditës, për të marrë po brenda të njëjtës ditë mendimin e ministrive të tjera dhe për ta shpallur kompaninë fituese pa garë. Të nesërmen kryeministri ta kishte gati shkresën në tryezën e tij.

Kjo shpejtësi e rrufeshme me të cilën u lidh kontrata për kompaninë anomine që mori 21 milion euro për inceneratorin e Elbasanit është ndoshta prova më e fortë që qeveria punoi si një ansambël për të vënë në jetë aferën e korrupsionit. Dihet se vetëm kryeministri ka fuqinë për ta vënë në lëvizje në të njëjtën kohë ansamblin e ministrive.

Momenti i tretë, që implikon kryeministrin Rama është sjellja e tij, kur Lefter Koka dorëzoi mandatin e deputetit. Pak pasi Partia Socialiste fitoi zgjedhjet e 25 prillit, Koka dha një shpjegim gjysmak, sikur mbyllte një cikël, për vendimin që mori. Në një atmosferë të pashpjegueshme, kryeministri Rama e pranoi në heshtje dorëzimin e mandatit të deputetit të Durrësit dhe respektoi Kodin e Heshtjes. Pikërisht kjo heshtje e Ramës, fakti që ai nuk u distancua, por ende sot ruan një qëndrim të kujdesshëm për ish-bashkëpuntorin e tij, tregon se kjo është një vepër që shkon përtej Lefter Kokës, por që duhet të mbetet tek vetëm një ?kokë turku?.

Kreu i qeverisë gjithnjë ka refuzuar të flasë për procedurat e dhënies së koncensionit për impiantin e përpunimit të mbetjeve. Kur është pyetur Rama është përgjigjur me pyetje: ?A keni parë ndonjëherë hajdut 2 metra??. Lapsi.al / CNA.al