E fundit!

16:05 Politikë

Rama për protestat: Në bulevard edhe turistë të shtirur, lëpijnë e pickojnë tubuesit e sinqertë

Kryeministri Edi Rama ka reaguar sërish lidhur me protesta...

Gjendja e ekipit, ja si pritet të luajë Skënderbeu sot ndaj Teutës

9 Shkurt 2022, 09:28, Sport CNA

Pas humbjeve në kampionat dhe pozicionit jo të favorshëm në klasifikim, Skënderbeu kërkon reagimin për të shpëtuar një sezon që duket tejet i komplikuar. Reagim ky që për bardhekuqtë kërkohet i dyfishtë si në Kupë ashtu edhe në kampionat. Sot korçarët luajnë ndeshjen e kthimit për Kupën e Shqipërisë përballë Teutës.

Pas humbjes së regjistruar dy javë më parë në shtëpi, të besuarit e Memellit do të kërkojnë përmbysjen në Durrës, takim që do të luhet në Niko Dovana. Për Migen Memellin, edhe Kupa është një objektiv po kaq i rëndësishëm sa kampionati, prandaj nuk do të ketë vend për kompromis apo rrotacion. Ndaj Teutës pritet që të zbresë në fushë Skënderbeu më i mirë që trajneri ka në dispozicion dhe normalisht me shumë pak ndryshime nga ai që luajti në fundjavë përballë Tiranës.

Ajo që po mban peng trajnerin bardhekuq është gjendja fizike e disa lojtarëve të rëndësishëm për korçarët. Një prej të cilëve është braziliani Moraesh. Me të në fushë, ofensiva e Skënderbeut është plot manovër dhe balancat në dyja fazat e lojës kanë qenë më të qëndrueshme. Pa Moraeshin ekipi ka vuajtur siç është parë edhe në ndeshjet e fundit, ku korçarët nuk kanë arritur të marrin pikë, pasi janë mundur në katër takime radhazi.

Mesfushori brazilian prej disa ditësh është bashkuar me ekipin në stërvitje dhe po tregon se ka kaluar problemin fizik, por nuk është në formën maksimale për të qenë i gatshëm plotësisht. Tani i takon trajnerit të vendosë. Memelli nga ana e tij është i dyzuar, të sakrifikojë Moraeshin në takimin e Kupës apo ta mbajë të gatshëm për ndeshjen e fundjavës me Partizanin. Duket se peshorja anon më shumë nga ky takim, që do të jetë tejet i rëndësishëm për Skënderbeun.

Për vetë faktin se ndodhet në vendin e tetë me 16 pikë, si dhe rivalët për mbijetesë janë afruar ndjeshëm. Vendi i fundit që mbahet nga Kastrioti që është vetëm një pikë larg. Ndaj, një hap fals në ndeshjen e fundjavës ndaj të kuqve mund të ketë pasoja serioze për sezonin e Skënderbeut. Tani ethet e qëndrimit në Superiore janë bërë më të forta.