Derbi në Kupë, Dritan Mehmeti: Ndaj Dinamos për fitore, blerjet e janarit janë vonuar

26 Janar 2022, 16:32, Sport CNA

Trajneri i Partizanit, Dritan Mehmeti ka folur para mediave, në prag të sfidës, që skuadra e tij do të luajë ditën e nesërme ndaj Dinamos.

Në fjalët e tij, Mehmeti tha se Kupa është objektiv i të kuqve dhe për këtë arsye skuadra futet në fushë vetëm për fitore. Më tej ai foli edhe për merkaton, ku theksoi se blerjet e janarit janë vonuar, pasi i donte më shpejt në skuadër.

?Dinamo ka ndryshuar, ne do të bëjmë mënyrën dhe filozofinë tonë kundër kujtdo kundërshtari, pavarësisht se me Dinamon është një ndeshje derbi dhe ka rëndësinë specifike sepse janë vetëm dy ndeshje që të japin mundësinë shumë të mirë për të kaluar turin.

Ndaj Kastriotit që mbrojnë me shumë forca, duhet të kesh më shumë durim përpara portës dhe ato raste që të vijnë duhet t?i konkretizosh në mënyrën e duhur, megjithatë ndaj Dinamos është një specifikë tjetër sepse është një ekip i mirëorganizuar, një ekip që të lë të luash futboll, këtu do të tregojmë vlerat tona reale.

Ne do të kërkojmë me patjetër fitoren. Do të futemi në fushë për të fituar, kush të jetë më i miri i uroj fitoren. Porosia e veçantë për sulmuesit është që të mos të ndjejnë presionin, të luajnë me entuziazëm dhe të luajnë pa vetëbesimin e tepërt që skuadra duhet të jetë fanatike në veprimet sulmuese.

Duke pasur parasysh pozicionin që ndodhemi në tabelën e renditjes në kampionat do të bëjmë maksimumin që të rritemi në shkallën e renditjes dhe në Kupë që është një bonus shumë i mirë që na dërgon në Kupat e Europës dhe që është objektivi minimal i Partizanit.

Shpresoj që në mbylljen e merkatos të plotësojmë disa elementë që i kemi të nevojshëm për të arritur objektivat. Partizani lufton gjithmonë për të dyja trofetë, në fushë do të zbresin më të mirët nesër. Duam që ta kalojmë këtë situatë ku jemi dhe të ngjitemi sa më lart dhe të shkojmë drejt objektivit që është Kupa.

Kemi shumë ndeshje përpara, ne do të luftojmë fort në të dyja frontet. Merkato e janarit të jep shumë pak mundësi, duhet të jesh shumë i kujdesshëm me përzgjedhjet sepse nuk kemi shumë alternativa. Blerja e lojtarëve të rinj janë vonuar sepse duke parë dhe skuadrën do t?i doja që në fillimin e janarit dhe do të ishin automatizuar sa më shpejt veprimet.

Bitri ka pasur disa probleme sepse kjo vjen si pasojë e mungesës së gjatë nga problemet e COVID-19 dhe me tapetin sintetik, sepse me Astanën ai është stërvitur me tapet tjetër dhe i ka ardhur ky dëmtim. Është rikuperuar 80%, sot do të jetë dita që do të vendosim për të shpresoj që Bitri të jetë në lojë, por kjo varet nga dakordësia që mund të japë stafi mjekësor?, u shpreh Mehmeti.