Zgjedhjet në 6 Bashki/ Paralajmërohen partitë politike: Kujdes me kandidatët

25 Janar 2022, 09:33, Politikë CNA

Komiteti i Helsinkit ka dalë me një paralajmërim për partitë politike, në lidhje me zgjedhjet e pjesshme vendor të 6 marsit, bazuar në dekretin e Presidentit të Republikës së Shqipërisë, në datën 6 Mars 2022 zhvillohen zgjedhjet e pjesshme vendore për Kryetar Bashkie në Shkodër, Dibër, Durrës, Vorë, Rrogozhinë dhe Lushnjë.

Në një deklaratë për mediat thuhet, se Komiteti Shqiptar i Helsinkit (KShH) vlerëson nismën e Komisionit Qendror të Zgjedhjeve (KQZ) në drejtim të shpejtësisë së masave të marra sidomos për caktimin e afateve që duhen respektuar në zbatimin e dispozitave përkatëse të Kodit Zgjedhor. Procedurat e miratuara nga KQZ kemi mendimin se ato janë plotësisht të realizueshme nëse do të ekzistojë vullneti i palëve pjesëmarrëse në këto zgjedhje.

?KShH duke patur parasysh përvojën tonë të monitorimit të zgjedhjeve të mëparshme e sheh të nevojshëm jo vetëm të sugjerojë, por edhe t?u bëjë thirrje partive politike (subjekteve zgjedhore) në koalicion ose jo, si dhe grupit të zgjedhësve që kanë të drejtë të propozojnë një kandidat të pavarur për Kryetar Bashkie, të kenë parasysh integritetin moral dhe politik të kandidatit dhe besueshmërinë e tij/saj në publik. Për këtë është e nevojshme të zbatohet me kujdesin e duhur legjislacioni në fuqi për të verifikuar figurën aktuale dhe të kaluarën e tyre.

Drejtuesit e partive politike (subjekteve zgjedhore) si dhe komunitetet nismëtarë, të ngarkuar për mbledhjen e firmave për kandidatin e pavarur më paraqitjen e dokumentacionit përkatës të kenë parasysh nenin 67 të Kodit Zgjedhor, ku bëhet fjalë për listën e kandidatëve të partive dhe koalicioneve të partive, si dhe nenin 70 të Kodit Zgjedhor përsa i përket kandidaturave të propozuara nga zgjedhësit?, thuhet në deklaratën e KShH-së.

KShH sugjeron që këshillimi me elektoratin për cilësitë dhe besueshmërinë e figurës së kandidatit për Kryetar Bashkie duhet të konsiderohet si element i domosdoshëm.

Në këtë drejtim, thuhet më tej në deklaratë, duhet shmangur çdo veprim formal që mund të reflektonte negativisht pas zgjedhjes së tyre.

?Procesi për zgjedhjen e kandidatëve duhet të shoqërohet me standartet dhe modelet pozitive të demokratizimit të brëndshëm të partive politike dhe të mos jetë produkt i vendimeve të njëanshme, apo me natyrë klienteliste.

KShH e shikon të nevojshme të theksojë se pavarësisht se zgjedhjet e 6 Marsit janë të pjesshme dhe të vonuara, kërkohet që ato të jenë të drejta dhe të ndershme, në respektim të standardeve që kërkohen. KShH e sheh gjithashtu të nevojshme t?i sugjerojë KQZ-së që të ndërhyjë në kohën e duhur për të parandaluar çdo cënim të dispozitave të Kodit Zgjedhor dhe udhëzimeve të tij?, përfundon deklarata e Komitetit të Helsinkit./CNA.al