web counter
LEXO PA REKLAMA!

SHKARKO APP

App Store
Google Play

E fundit!

x

Si e kaloi Vettingun prokurorja Dhorina Theodhori?/ Çështja që ngre dyshime

27 Nëntor 2021, 12:29, Vetingu CNA

Vettingu nisi me bujë para rreth tre vitesh me kryefjalën se do të pastronte sistemin e drejtësisë.

Në këto tre vite janë ?prerë dhjetra koka? gjyqtarësh dhe prokurorësh, kryesisht për pasurinë, por ka pasur raste edhe për pastërtinë e figurës.

Ky proces ndërkohë dyshohet se është shoqëruar edhe me dy-standartizim si në shkallë të parë ashtu edhe në shkallë të dytë.

Janë vetë prokurorët dhe gjyqtarët që nën zë e thonë këtë gjë, kur janë konfirmuar në detyrë emrat që mbartin skandale dhe kur janë shkarkuar ata që meritonin të ishin pjesë e sistemit të drejtësisë.

Një ndër rastet që lakohet është edhe drejtuesja e Prokurorisë së Korçës, Dhorina Theodhori.

Theodhori në Vetting

Dhorina Theodhori që drejton Prokurorinë e Korçës, ka dalë në Vetting para dy vitesh dhe është konfimuar në detyrë, që në shkallën e parë dhe ndaj saj nuk ka pasur ankimim nga Komisioneri Publik.

Kujtojmë se Komisioni i Pavarur i Kualifikimit vendosi në Prill të vitit 2019,  konfirmimin në detyrë të drejtueses së Prokurorisë së Korçës, Dhorina Theodhori.

Vendimi u shpall nga trupa gjykuese, e drejtuar nga Pamela Qirko dhe me anëtare Genta Tafa Bungo dhe Etleda Çiftja.

Më herët, para se të dilte në Vetting, BIRN kishte identifikuar si ?flamur të kuq? deklarimin e pasurisë së Theodhorit, në vitin 2017, që kishte lidhje me rikonstruksionin e çatisë, fasadave dhe një shtesë kati të një dyqani në tregun e qytetit të Korçës, investim i kryer nga Bashkia e Korçës dhe Fondi Shqiptar i Zhvillimit.

Dyqani, sipas BIRN,  nuk rezulton i deklaruar më parë nga prokurorja Dhorina Theodhori, ndërkohë që ishte e paqartë burimi i kësaj pasurie apo marrëdhënia e saj e pronësisë me këtë objekt.

KPK në krah të prokurores

Komisioni i Pavarur i Kualifikimit, në vendim shkruan se nuk ka gjetur probleme në pasurinë e Theodhorit.

Sipas KPK, nga verifikimi pasuror ka rezultuar se subjekti ka kryer deklarim të saktë dhe ka burime të ligjshme për pasurinë e saj.

Komisioni nuk ka gjetur probleme me deklarimin e pasurisë së trashëguar nga i ati, truall me sipërfaqe 56 m2 dhe ndërtesë 55 m2, me pjesë takuese 1/3 dhe as tek ndryshimet në strukturë dhe rikonstruksion nga Bashkia e Korçës në kuadër të projektit të rikualifikimit të zonës së quajtur ?Pazari i Vjetër? janë gjetur të sakta.

Sipas KP-së, të sakta kanë qenë edhe  deklarimet për një apartament 67 m2 në bashkëpronësi me nënën dhe motrën si dhe përfitimin e një sipërfaqeje toke me vendim gjykate.

Mediat kanë raportuar se gjatë seancës dëgjimore në KPK,  u konstatua një deklarim i vonë i një shtese prej 12 m2, ndërtuar në vitin 2009 dhe deklaruar në vitin 2014, por prokurorja Theodhori ka thënë në  në seancë se kishte menduar që momenti ligjor i deklarimit të kësaj pasurie ishte koha kur familja kishte bërë kërkesë për legalizimin e saj.

Në KPK për prokuroren Theodhori ka pasur edhe një denoncim, në të cilin thuhej se prokurorja Theodhori kishte vendosur mosfillimin e hetimit për një çështje, ndërkohë që një gjyq civil zhvillohej në gjykatë.

Theodhori është mbrojtur në seancë me idenë se denoncimi nuk kishte indicie dhe se vendimi i mosfillimit të hetimit ishte mbështetur nga eprori i saj./CNA.al





Lajmet e fundit nga