Iu sul gazetarit, shoqatat e mediave dënojnë aktin e prokurorit Kasaj

17 Nëntor 2021, 21:35, Denoncim CNA

Emisioni ?Stop? i është drejtuar me shkresë zyrtare ILD-së dhe KLP-së, për aktin e prokurorit dhe shkeljet e tij të panumërta.

Një ditë më parë prokurori i Gjirokastrës Emëror Kasaj shfaqi arrogancë dhe fyerje në komunikim me gazetarin e ?Stop?, duke e quajtur maskara dhe budalla.

Emëror Kasaj: Sepse i kam pirë lëngun edhe sorrat, më kupton? Edhe mender teje..

Emëror Kasaj: Kam marrë 100 nuk kam marrë 10.

Gazetari: Bravo.

Emëror Kasaj: 150, 300.

Gazetari: Edhe 500.

Emëror Kasaj: Për ju të Stopit po.

Lidhur me sjelljen e prokurorit kanë reaguar edhe shoqatat e mediave.

Armand Shkullaku, Ylli Rakipi dhe Aleksandër Çipa e quajnë të papranueshëm aktin e njeriut të akuzës, duke kërkuar, që të mos intimidohet media në punën e saj, por njerëzit e ligjit të përgjigjen për denoncimet për shkelje e abuzim me ligjin.

Gazetari: Çfarë shije të ka lënë sjellja e prokurorit të Gjirokastrës?

Armand Shkullaku: Sigurisht një shije të shëmtuar. Po të mos më kishit thënë ju që bëhet fjalë për një prokuror do ta merrja për një konflikt midis njerëzve të rrugës dhe gazetarëve. Mënyra si foli, paraqitja e tij, gjuha e përdorur është skandal. Gati në kufijtë e të pabesueshmes. Një përfaqësues i drejtësisë nuk mund të flasë në atë mënyrë. Mund të ofendojë një qytetar, jo aq më tepër gazetarët apo mediat që janë duke bërë detyrën e tyre. Prokurori në fjalë duhet ta ketë parasysh që ai paguhet nga taksat e qytetarëve shqiptarë.

E ka detyrim të përgjigjet, të japë informacion, ose dhe mos të bëjë koment. Dhe nuk ka asnjë të drejte të ofendojë njerëzit, të ofendojë qytetarët. Sigurisht që unë nuk pres nga ai model prokurori që pashe në filmimet tuaja që të kërkojë ndjesë publike për këtë gjë. Që do të ishte gjëja e parë dhe emergjente në këtë situatë. Pres që Inspektoriati i Lartë i Drejtësisë duhet të veprojë.

Ne kemi parë që ky inspektoriat është shqetësuar shumë në raste tjera për punonjës të drejtësisë që dëgjojnë muzikë apo kërcejnë në makinën e tyre dhe e kanë quajtur atë si shkelje të etikës duke i larguar nga funksionet që kanë. Ky është një rast që nuk mund të kalojë në heshtje. Nuk mund të kalojë pa u analizuar dhe pa u marrë një masë.

Ylli Rakipi: Në fakt unë e pashë atë dhe është skandaloze është një moment shumë skandaloz. Nuk më dha aspak pështypjen e një prokurori. Njeri shumë vandal shumë rrugaç. Ishte një akt shumë i shëmtuar. Unë nuk e kuptoj sesi një njeri ligji mund të jetë ai portret. Duhet të marrim masa sa më parë sepse ai njeri të fyejë një njeri që shikon punën e vet siç është drejtuesi i një emisioni, është një skandal tjetër.

Aleksandër Cipa: Kurrsesi nuk do ta quaja një komunikim normal aq më tepër për opinion publik dhe për mediat në mënyrë të veçantë të një përfaqësuesi të drejtësisë, aq më tepër të akuzës. Në pasazhin që ndoqa verifikoj se ekziston gjuha e intimidimit./tvklan.al