Kolegu i tij flet për humbjen e Kosta Grillos: E vranë që kur e pushuan nga puna në RTSH

5 Tetor 2021, 12:40, Sport CNA

Mëngjesin e sotëm, ndërroi jetë në moshën 59-vjeçare, komentatori i futbollit, Kosta Grillo, i cili ishte infektuar me Covid-19 prej kohësh. Pas një lufte të gjatë nga gushti i këtij viti, Grillo nuk ia doli dot. Për këtë, në edicionin e lajmeve në MCN TV, foli gazetari i sportit dhe një mik i afërt i Kosta Grillos, Ervin Baku.

Ky i fundit u shpreh se largimi nga jeta e Grillos është një humbje e madhe për të gjithë komunitetin e gazetarëve të sportit dhe jo vetëm. Gjithashtu Baku foli edhe për të kaluarën e Grillos, ku tha se u hoq nga puna padrejtësisht nga RTSH, ku ai komentonte Kombëtaren. Ai tha se ky largim nga puna, i la Grillos një plagë të madhe.

?Grillo ka qenë i shtruar në Turqi që më 12 gusht dhe më 27 gusht është futur në intubim. Nuk kemi pasur kontakte me Kostën, por me familjarët e tij. Luftoi shumë, por nuk ia doli. Ishte e shkruar ndryshe, janë punë të Zotit. Grillo futet te njerëzit që janë të pavdekshëm. Lë një boshllëk shumë të madh.

Kosta Grillo ishte zëri i Kombëtares shqiptare, prej një jete ishte një gazetar dhe menaxher i suksesshëm. Do mbetet i pavdekshëm i Kombëtares. Një zë që para 3-4 vitesh, e hoqën nga puna padrejtësisht në RTSH. Për mendimin tim, e vranë shumë aty. Grillo e donte jetën, luftoi deri në fund. Më kujtohet buzëqeshja para se të futej në reanimacion. Ai sot është një yll, që iu bashkohet yjeve në qiell. Për mendimin tim, do vazhdojë të komentojë aty në qiell lojtarët e mëdhenj që janë ngjitur atje lart. Ishte një njeri me shpirt të pastër. Është një humbje e madhe. Lum ata që e kanë njohur nga afër.

Largimi nga RTSH ishte një padrejtësi e madhe. Kjo është Shqipëria, nisur me hipokrizi. Si mund të largohet nga puna zëri i Kombëtares?! Për këtë, njerëzit duhen dashur dhe vlerësuar sa janë gjallë. Kosta e kishte shpirtin e plagosur, pasi u hoq padrejtësisht. Një ditë të bukur sepse i teket dikujt, ai hidhet në rrugë padrejtësisht.

Nëpërmjet televizionit tuaj, i shpreh ngushëllime dy djemve të tij, motrës dhe bashkëshortes së tij, por edhe të gjithë miqve të tij. Është një humb je e madhe për të gjithë komunitetin e gazetarëve të sportit.?, u shpreh Baku.