E fundit!

12:50 Aktualitet

Vrasja e Martin Canit/ Gjykata e Apelit lë në fuqi dënimin për autorin

Gjykata e Apelit ka lënë në fuqi vendimin për dënimin me 1...

Foto-Kuvendi kapet në “flagrancë”/ ISP rendit shkeljet: Nuk përmbushën detyrimet e veta ligjore

4 Tetor 2021, 11:53, Politikë CNA

Më 20 tetor 2020 Kuvendi (Komisioni për Ekonominë dhe Financat) ka zhvilluar seancë dëgjimore për dy kandidatët e dekretuar nga Presidenti për anëtarë të Komisionit të Konkurrencës. Sipas dokumentacionit të mbledhur nga Instituti i Studimeve Politike (ISP) në përfdundim të mbledhjes, zonja Milva Ekonomi, me cilësinë e kryetares ka deklaruar se ?ne i vlerësojmë shumë kandidaturat tuaja dhe do t?i përcjellim në seancë për të marrë vendimin?.

Sipas ISP, praktika parlamentare është e qartë: kandidatët kalojnë nga komisionet në seancën më të afërt plenare. Në fakt kjo rrugë administrative zgjati …. 1 vit!

Sot më 4 tetor 2021, pra një vit më pas dhe në kushtet e një parlamenti të ri, përsëri komisioni për financën dhe ekonominë zhvilloi seancë dëgjimore me të njëjtët kandidatë dhe për të njëjtin dekret. Pa dhënë sqarime për vonesën njëvjecare dhe pa sqaruar ligjërisht përse për të njëjtët kandidatë nuk vlen seanca e parë dëgjimore, por përsëritet, seanca u përsërit dhe kandidatët thanë në thelb të njëjtat vlerësime si në tetorin e vitit të kaluar!

Praktika të tilla kritike, kur parlamenti nuk përmbush detyrimet e veta ligjore duke lënë poste vakante për një kohë të gjatë ose duke zgjatur mandatin e atyre kur iu ka mbaruar mandati për një kohë të gjatë, nuk janë përjashtim, por rrezikojnë të kthehen në metodikë pune.

Kuvendi ende nuk ka zgjedhur anëtarin e Bordit për Autoritetin e Dosjeve edhe pse kandidatët kanë aplikuar dhe dosja mbahet në komisionin e ligjeve prej dy vitesh, gjithashtu mandatet e anëtarëve të AMA nuk u zëvendësuan për një periudhë kohe të gjatë.

Praktika të tilla janë jo vetëm devijim nga praktikat e mira parlamentare, por edhe zhvillime që krijojnë bazë dyshimi se vonesat apo anulimi i thirrjeve / përsëritja e tyre, kanë të bëjnë me preferenca politike apo klienteliste, – dyshime që dëmtojnë vetë institucionin e parlamentit dhe gjithashtu kanë impakt negativ edhe për vetë institucionet kushtetuese ose ato publike që lidhen me to.

Instituti i Studimeve Politike (ISP) fton parlamentin të ndjekë e zbatojë praktikat e mira parlamentare, sipas të cilave procedura për vendet me emërtesë Kuvendin fillojnë përpara mbarimit të mandatit të zyrtarëve të emërtesës dhe përfundojnë në kohën kur skadon afati, duke evituar boshllëqe të mundshme kohore ose procedurale midis mandateve të skaduara dhe atyre të reja. Gjithashtu Kuvendi mund dhe duhet të jetë transparent dhe të monitorojë vetveten, duke analizuar rastet e vakancave dhe praktikave devijuese, për të hetuar motivet dhe pasojat.