web counter
LEXO PA REKLAMA!

SHKARKO APP

App Store
Google Play

Bashkëshorti iu arrestua gjatë protestës/ Reagon ish-ministrja Shahini

7 Shtator 2021, 13:45, Kosova & Bota CNA

Ish-ministrja e Arsimit, Besa Shahini ka reaguar lidhur me arrestimin e bashkëshortit të saj, Kreun e PSD-së, Dardan Molliqaj.

Shahini thotë se kryeministri Albin Kurti dëshiron të shuajë çdo zë opozitar në Kosovë, ndërsa ka nënvizuar se kjo nevojë ka kaluar në absurditet.

Ish-ministrja ka shtuar se aktivistët u rrahën dhe u arrestuan dhunshëm.

Postimi i plotë:

Nevoja e Albinit që të shuajë çdo zë opozitar në Kosovë ka kaluar në absurditet. Pesë aktivistët në aksionin simbolik kundër gjykatës së padrejtë speciale – tashmë e shndërruar në gjykatë kundër UÇK-së  u rrahën dhe arrestuan dhunshëm. Në korrik ndodhi e njejta, kur Albini nxorri policinë për të mbrojtur një taksë absurde shtesë të regjistrimit të makinave, të cilën e tërhoqi më vonë.

Para kësaj, u organizua një protestë e vogël kundër hipokrizisë së VV-së e cila bëri fushatë të hapur elektorale, të rrezikshme për shëndetin midis pandemisë dhe menjëherë pasi fitoi zgjedhjet vendosi masa të rrepta duke u thirrur në pandemi, që rezultuan në mbyllje biznesesh dhe gjobitje marramendëse të qytetarëve. Protesta u mbyll me dhunë policore, aq në shpërputhje me aksionin e protestuesve, sa nuk ishte parë që nga koha e UNMIK-ut.

Nëse nuk i shuan me dhunë, Albini nxjerr ministrat e vet në protestë, për ta përvetësuar kauzen, siç ndodhi me daljen e turpshme të ministres së drejtësisë dhe atij të brendshëm në protestat kundër vrasjes brutale të një gruaje të re nga partneri i saj.

Shëndeti i demokracisë në Kosovë është në pikën e vet më të brishtë që nga paslufta. E vetmja fije shprese është fakti që nën pushtetet e dhunshme, pashmangshëm rritet e forcohet opozita. Kështu që paradoksalisht, nevoja dhe hapësira për opozitë të re dhe të zëshme po vjen duke u rritur./ CNA.al





Lajmet e fundit nga