E fundit!

09:19 Denoncim

Financimi i kullës së Ervin Matës/ Plug: Mbi 28 milionë euro autofaturime për kompanitë e lidhura me Vilma Nushin

Pas denoncimit të parë, emisioni Plug ka vijuar sërish inv...

Diplomatët amerikanë dërgohen drejt aeroportit të Kabulit

15 Gusht 2021, 13:00, Kosova & Bota CNA

Vatikan– Papa Françesku tha të dielën se ndan “shqetësimin për situatën në Afganistan” ndërsa luftëtarët talebanë po zgjerojnë kontrollin në vendin e shkatërruar nga lufta.

Ai foli kur talebanët hynë në periferi të Kabulit, kryeqytetit afgan dhe tha se ata ishin duke pritur një “transferim paqësor” të kryeqytetit.

Nga një dritare me pamje nga Sheshi i Shën Pjetrit, Papa bëri thirrje për lutje “në mënyrë që zhurma e armëve të pushojë e që zgjidhjet të gjenden në tryezën e bisedimeve”, siç tha ai.

Ai shtoi se “vetëm në këtë mënyrë, popullata e goditur e vendit, burra dhe gra, të moshuar e fëmijë do të kthehen në shtëpitë e tyre dhe të jetojnë në paqe dhe siguri, me respekt të plotë reciprok”

Berlin – Gjermania po dërgon avionë transporti ushtarak në Kabul për të filluar evakuimin e stafit të ambasadës së saj të hënën.

Agjencia gjermane e lajmeve (dpa) njoftoi të dielën se misioni do të përfshijë evakuimin e stafit afgan që punon për ambasadën gjermane.

Aeroplanë ushtarakë pritet të transportojnë të evakuuarit nga Kabuli në një bazë në Azinë Qendrore.

Moskë – Agjencia shtetërore e lajmeve ruse raportoi të dielën se talebanët premtuan të garantojnë sigurinë e ambasadës ruse në Kabul.

Agjencia Tass citoi Suhail Shaheen, një zëdhënës i zyrës politike të talebanëve, të thotë se organizata ka “marrëdhënie të mira me Rusinë” dhe në përgjithësi “një politikë për të garantuar siguri për funksionimin e ambasadës ruse e të tjerave”.

I dërguari i Kremlinit për Afganistanin tha të dielën se nuk ka plane për të evakuuar ambasadën ruse në Kabul. Zamir Kabulov i tha agjencisë së lajmeve Interfax se ambasadori rus dhe stafi i tij “po kryejnë me qetësi detyrat e tyre”.

Njoftimet vijnë ndërsa luftëtarët talebanë hynë në Kabul pas një sulmi njëjavor përpara tërheqjes përfundimtare të trupave amerikane dhe të NATO-s. Talibanët thanë se nuk planifikojnë ta marrin kryeqytetin me forcë.

Kryengritësit talebanë filluan të hyjnë të dielën në Kabul, kryeqytetin e Afganistanit, tha një zyrtar i ministrisë së brendshme, ndërsa Shtetet e Bashkuara po evakuojnë diplomatët nga ambasada e tyre me helikopterë.

Zyrtari i lartë i tha Reuters se talebanët po vinin “nga të gjitha anët”, por nuk dha hollësi të tjera.

Në një postim ne llogarinë e pallatit presidencial afgan në twitter thuhet se të shtënat ishin dëgjuar në disa pjesë rreth Kabulit, por forcat e sigurisë, në bashkërendim me partnerët ndërkombëtarë, kanë qytetin nën kontroll.

Zyrtarët amerikanë thanë se diplomatët po transportoheshin në aeroport nga ambasada në zonën e fortifikuar, Wazir Akbar Khan. Më shumë trupa amerikane janë dërguar për të ndihmuar evakuimet pasi përparimi i rrufeshëm i talebanëve e solli grupin islamik në Kabul brenda pak ditësh.

Javën e kaluar, një vlerësim i shërbimeve amerikane të zbulimit tha se Kabuli mund të qëndrojë për të paktën tre muaj.

Pjesëtarët e ekipit amerikan po punonin nga aeroporti i Kabulit, tha një zyrtar amerikan, ndërsa një zyrtar i NATO -s tha se një pjesë e personelit të Bashkimit Evropian është zhvendosur në një vend më të sigurt në kryeqytet.

Një zyrtar taleban i tha Reuters se grupi nuk donte viktima , por nuk ka shpallur ndonjë armëpushim.

Nuk pati asnjë reagim të menjëhershme mbi situatën nga presidenti Ashraf Ghani, i cili tha të shtunën se ishte në konsultime urgjente me udhëheqësit vendas dhe partnerët ndërkombëtarë për gjendjen në vend.

Më herët të dielën, kryengritësit pushtuan pa luftë qytetin lindor Jalalabad, gjë që u dha atyre kontrollin mbi një prej autostradave kryesore në Afganistanin pa dalje në det. Ata gjithashtu morën postën kufitare më Pakistanin në Torkham, duke lënë aeroportin e Kabulit të vetmen rrugëdalje nga Afganistani, që është ende në duart e qeverisë.

Marrja e Jalalabadit pasoi pushtimin e qytetit verior të Mazar-i-Sharif të shtunën vonë, gjithashtu me pak luftime.

?Nuk ka përleshje tani në Jalalabad sepse guvernatori u është dorëzuar talebanëve”, i tha agjencisë Reuters tha një zyrtar afgan me seli në Jalalabad. “Lejimi i kalimit të talebanëve ishte mënyra e vetme për të shpëtuar jetën e civilëve”.

Një video e shpërndarë nga talebanët tregoi njerëzit që brohorisnin Allahu Akbar (Zoti është i madh), ndërsa një autokolonë hyri në në qytet me luftëtarët që tundnin armët dhe flamurin e bardhë talebanë.

Pasi forcat e udhëhequra nga Shtetet e Bashkuara tërhoqën pjesën më të madhe të trupave të tyre muajin e fundit, fushata e talebanëve u përshpejtua meqë mbrojtja e ushtrisë afgane, ra.

Presidenti amerikan, Joe Biden, të shtunën autorizoi vendosjen e 5 mijë trupave amerikane për të ndihmuar evakuimin e qytetarëve dhe për të siguruar një tërheqje “të rregullt dhe të sigurt” të personelit ushtarak. Një zyrtar amerikan i mbrojtjes tha autorizimi përfshinte 1 mijë trupa të Divizionit të 82 -të Ajror./ VOA