E fundit!

17:41 Kosova & Bota

Trump tërhiqet nga tarifa prej 20% në Ngushticën e Hormuzit/ Ja me çfarë do ta zëvendësojë masën

Presidenti amerikan Donald Trump është tërhequr nga vendos...

Rusia fillon manovrat ushtarake me aleatët përgjatë kufirit afgan

6 Gusht 2021, 20:00, Kosova & Bota CNA

Rusia fillon këtë javë stërvitje masive ushtarake me aleatët e saj të Azisë Qendrore, Taxhikistanin dhe Uzbekistanin pranë kufirit të Taxhikistanit me Afganistanin. Manovrat mbahen në një kohë kur Shtetet e Bashkuara po tërheqin trupat nga Afganistani, ndërsa talebanët po zgjerojnë me shpejtësi territorin e tyre. Korrespondenti i Zërit të Amerikës, Charles Maynes njofton nga Moska.

Ndërsa po afron tërheqja e plotë e trupave amerikane nga Afganistani, Rusia po ndjek një qasje me dy drejtime në rajon.

Nga njëra anë, Rusia po përpiqet të shtrijë ndikimin e saj përmes diplomacisë, me Ministrinë e Jashtme ruse që po zhvillon bisedime të vazhdueshme me përfaqësuesit e talebanëve për të realizuar këtë synim.

Nga ana tjetër, Moska po demonstron fuqinë e saj ushtarake, duke marrë pjesë në një stërvitje të përbashkët me aleatë e saj të Azisë Qendrore që ka për synim të rrisë gatishmërinë për t’u përballur me një krizë të mundshme, thonë analistët.

“Është mirë që amerikanët po tërhiqen, por në të njëjtën kohë ky është edhe një zhvillimi i negativ për Rusinë. Është një mundësi dhe një kërcënim shumë i rëndë për interesat jetike ruse”, thotë analisti i mbrojtjes Pavel Felgenhauer nga Gazeta ?Novaya?.

Kremlini është i shqetësuar se luftimet e reja mund të destabilizojnë Azinë Qendrore, një rajon tradicionalisht nën ndikimin e Moskës.

Por vëzhguesit paralajmërojnë se ushtria nuk është e pajisur mirë për të trajtuar kalimin e kufirit nga dhjetëra mijëra refugjatë dhe përhapjen e ekstremizmit islamik në një rajon të njohur për qeveritë e dobëta autokratike, varfërinë dhe korrupsionin.

“Përdorimi i tankeve kundër ekstremistëve është i pakuptimtë. Ato janë dislokuar atje vetëm për të treguar se fuqia politike e Rusisë në rajon ka qenë dhe do të jetë gjithmonë e pranishme. Por një pyetje tjetër dhe më e debatueshme është se çfarë fraksioni talebanësh mund të vijnë në pushtet?”, thotë Alexey Malashenko nga Instituti i Ekonomisë Botërore dhe Marrëdhënieve Ndërkombëtare.

Rusia ka mbajtur prej kohësh një bazë të madhe ushtarake pranë kufirit të Afganistanit me Taxhikistanin.

Moska thotë se, nëse është e nevojshme, ajo është e gatshme të ndihmojë aleatët, bazuar në një marrëveshjeje kolektive të sigurisë.

Zyrtarisht, Rusia ende i konsideron talebanët si një organizatë terroriste.

Por duke marrë parasysh luftën e saj vdekjeprurëse prej një dekade në Afganistan në vitet 1980, që përfundoi më tërheqjen e saj, shumë analistë mendojnë se Moska nuk është e etur për një angazhim tjetër ushtarak atje.

Por edhe injorimi i çështjes afgane nuk është një opsion i mirë.

?Rusia ka shumë për të humbur. Amerika mund të largohet nga Afganistani dhe ta harrojë atë si një ëndërr të keqe. Ata e kanë këtë privilegj. Rusia nuk mund ta bëjë këtë”, thotë Pavel Felgenhauer, analist i mbrojtjes në Gazetën ?Novaya?.

Ndërsa roli amerikan në Afganistan është afër përfundimit, disa vëzhgues në Moskë thonë se Shtetet e Bashkuara janë detyruar të marrin mësimin sovjetik mbi kufizimet e një perandorie.

Megjithatë, ndryshimi i shpejtë i rrethanave në terren ofron pak garanci mbi atë që do të ndodhë pas tërheqjes amerikane./VOA