Open Balkan, Open Mind apo Open Goran!

6 Gusht 2021, 14:31, Opinione CNA

Nga Arian Galdini

A e mbani mend sesi nisi e gjitha kjo?

Pak vite më parë ekipi ynë kombëtar i futbollit u nis drejt Beogradit për ndeshjen Serbi – Shqipëri.

Ishte ndeshje futbolli, thjesht ndeshje futbolli, e madje luhej në kuadër të UEFA.

E megjithatë ne i përcollëm tanë asokohe, plot epizëm, a thua se po shkonin në luftë.

Ekipi ynë dhe tifozët tanë VIPa, shoqëroheshin nga Policia e Serbisë dhe gjithçka nga aeroporti, në rrugë e deri në Stadiumin e Beogradit, dukej si situatë Gjendjeje të Jashtëzakonshme.

Imagjinoni pak, ne nuk çojmë dot as Kombëtaren tonë që të luajë futboll në Beograd, sepse të imagjinosh se ndonjë këngëtar shqiptar do të ftohet në Serbi për të kënduar në sheshet, sallat apo festat e tyre, duket e pamundur fare.

Ndërkohë, mendjehapurit e vendit tonë i bëjnë ftesë një këngëtari çetnik si Goran Bregoviç, që të na harbojë me muzikën e tij, e që ne të ndihemi kozmopolitë, tolerantë dhe në modë.

Por pa kujtohuni pak…

Kujtohuni pak…

Çfarë ndodhi 2 apo 3 vite më parë kur shkrimtari Peter Handke mori çmimin Nobel në letërsi?

A e mbani mend?

Personalitete të larta të botës së artit, kulturës dhe mendimit në Perëndim, filluan të shkruanin me përbuzje ndaj Handke.

Disa prej tyre madje i kërkuan Akademisë së Nobelit, që tia revokojë (heqë) çmimin e dhënë Handkes.

E këtë e bënë Europianë e Perëndimorë në modë, mendjehapur e mendjendriçuar.

Askush nuk i quajti ksenofobë e as e krahasuan peshën e Handkes si mik dhe mbështetës shpirtërir i Milosheviçit, me konsumin e produkteve serbe në Kosovë.

Gjithmonë krahasimi i ushqimit të mendjes me produktet e trupit e stomakut, është krejt pa lidhje e banal.

Edhe poeti Ezra Pound, ndonëse fitues i çmimit Nobel, pas L2B, u fut në kafaz e u shëtit në rrugë për tu pështyrë nga qytetarët, sepse ai ishte shprehur si mbështetës dhe adhurues i Hitlerit dhe Nazizmit.

Me pak fjalë, qëndrimet e artistit duhet të kenë kosto edhe për artin e tij, sidomos kur bëhet fjalë për qëndrime skandaloze raciste e arkaniste si ato të Bregoviçit.

Nuk ka asnjë vlerë promovuese as për Open Balkan kjo ftesa servile për Goran Bregoviçin.

Përkundërazi e turpëron nismën duke e kthyer në Open Goran.