E fundit!

14:51 Aktualitet

Pas më shumë se 5 orësh, Igli Tare del nga SPAK

Ish-futbollisti i Kombëtares shqiptare të futbollit, Igli ...

Shqipëria në flakë/ Qarqet që janë marrë “peng” nga zjarri

3 Gusht 2021, 11:10, Aktualitet CNA

Situata në Shqipëri shfaqet alarmante përsa i përket zjarreve që pothuasje kanë prekur të gjithë vendin.

Brenda muajit Korriku janë shënuar shumë vatra zjarresh aktive. Rreziku në disa prej zonave mbetet i madh, sidomos në pjesën jugore të Shqipërisë. Deri më tani mësohet se situata e zjarreve në Karaburun është alarmante, por po punohet intensivisht nga Forcat e Armatosura në shuarjen e flakëve.

Ndërkaq zjarre aktive ka edhe në qarqet si Kukësi, Tirana, Elbasani, Fieri , Berati, Korça, Vlora dhe Gjirokastra.

Sipas të dhënave të IGJEUM, më poshtë po iu pasqyrojmë situatën aktuale për disa prej qarqeve që janë përfshirë më shumë nga zjarri.

Qarku i Kukësit

Në Kukës janë dy vatra zjarri të shfaqura në ditët e fundit, një në fshatin Shikaj dhe një në fshatin Bardhoc. Mësohet se zjarret janë izoluar tërësisht.

Qarku i Tiranës

Një qark problematik mbetet edhe Tirana, ku shënohen mbi 10 deri në 12 vatra zjarri. Zonat më problematike shfaqen në malin e Dajtit, zona të Krrabë dhe Farkës. Forcat e armatosura janë në lëvizje për sigurimin e mospërhapjes së zjarreve. Në qarkun e Tiranës herë pas here po krijohen vatra të reja, ku shkak janë bërë edhe pikniqet që organizojnë qytetarët me zgara apo hedhja e cigareve.

Qarku i Fierit

Një nga qarqet që prej javësh është përfshirë nga flakët është edhe Fieri. Vetëm gjatë muajit Korrik është raportuar për 100 vatra që kanë djegur qindra hektarë bimësi. Prej ditësh janë djegur edhe mbetjet në zonën e Mbrostarit e sërish disa vatra janë aktivizuar në zona të tjera. Flakët e zjarrit kanë përfshirë kodrat në fshatin Cakran të Fierit, që janë përhapur në një zonë me ullinj dhe shumë bimë janë djegur. Në qarkun e Fierit vatra e zjarrit në Kreshpan është fikur plotësisht, ndërkohë në vatrën e zjarrit në vendgrumbullimin e plehrave, sipas verifikimit të përfaqësuesve të AKMC- së, situata është drejt normalizimit. Kjo, falë punës së organizuar në nivel qarku, pasi është bërë izolimi i pothuajse 70% të sipërfaqes nga hedhja e dherave dhe masave të tjera të marra.

Qarku i Beratit

Berati ka qenë qark i rrezikshëm dhe i prekur nga flakët. Në qarkun e Beratit është prekur mali i Tomorrit, ku zjarri është riaktivizuar edhe pasi situata është normalizuar. Zjarri i parë dogji Malin e Tomorrit për 9 ditë rresht, duke shkrumbuar më shumë se 25 hektarë pyje. Ndërkohë për shkak të terrenit të vështirë vatrat e zjarrit u përhapën në pjesën jugore dhe ishte ndërhyrja nga ajri ajo që bëri të mundur shuarjen e tyre. Për këtë situatë në një prononcim për mediat drejtori i ADZM, Fatos Nako ka bërë një përmbledhje të të gjithë situatës nga zjarret e ditëve të fundit në malin e Tomorrit.

?Fillimisht ai u shfaq në një zonë të vështirë në një lartësi mbi 1400 metër mbi nivelin e detit, por terreni i vështirë bëri të mundur përhapjen e mëtejshme të tij. Më pas, është ngritur dhe shtabi i emergjencave duke bërë të mundur koordinimin e të gjithë forcave për të bërë të mundur shuarjen e vatrave të zjarrit. Në ditën e katër ne u bë i mundur dhe përfshirja e forcës njerëzore përveç helikopterit. Terreni i vështirë ka qenë dhe ndër shkaqet kryesore të përhapjes së flakëve. Deri më tani nuk mund të futemi për të bërë dhe raportin në lidhje me sipërfaqen që është djegur, por mendojmë se mbi 200 hektarë mund të jetë dëmtuar?, ka thënë ai.

Qarku i Vlorës

Prej disa ditësh është rrethuar nga zjarret që kanë përfshirë zonën e Radhimës, zonën pranë Orikumit dhe Karaburunin. Një vatër tjetër është në Selenicë. Për të mbajtur nën kontroll minsitri i Mbrojtjes Niko Peleshi ka vënë në dispozicion 500 efektivë të ushtrisë që po punojnë për të shuar flakën në rrugë tokësore, ndërkohë edhe tre helikopterë janë në aksion për të shuar flakët në rrugë ajrore.

Qarku i Sarandës

Një zjarr i përmasave të mëdha ka përfshirë javën e fundit të Korrikut, edhe një sipërfaqe toke në një fshat të Sarandës, i quajtur Shelegar.Nga zjarri i rënë janë djegur edhe 350 rrënjë ullinj.

Pas Vlorës, Rradhimës, Karaburunit dhe Selenicës flakët zbriten në skajin jugor të vendit. Një zjarr masiv është duke avancuar drejt zonës së banuar në Ksamil. Sipas kreut të zjarrfikëseve, zjarri që nisi rreth mesditës së 31 Korrikut në lartësinë e kullotave malore përparoi me shpejtësi i favorizuar edhe nga era dhe tani gjendet pranë një blloku ullinjsh gati 500 metra nga banesat.

Aktualisht situata më e ngarkuar është ajo e Vlorës, në pjesën e Karaburunit dhe fshatit Dukat. Forcat e Armatosura janë në gadishmëri dhe po punojnë për eleminimin e përhapjes së zjarrit më tej. /CNA.AL