Sandër Lleshaj nën hetim për tenderin e uniformave/ Flet Arben Kraja

12 Korrik 2021, 08:47, Kronika CNA

Ditën e shtunë, me urdhër të SPAK u arrestuan 9 zyrtarë dhe ish-zyrtarë të Ministrisë së Brendshme lidhur me tenderin e uniformave të Policisë së Shtetit.

Për këtë tender, gishti është drejtuar edhe nga ish-Ministri i Brendshëm Sandër Lleshaj, i cili një ditë më parë mohoi se kishte dijeni për këtë aferë korruptive.

Lleshaj është shënjestruar pasi në kohën kur ka ndodhur ky skandal ai ka qenë në krye të Ministrisë së Brendshme, madje në vijimësi ka mohuar të ketë ndodhur një gjë e tillë.

Për ta përforcuar, se kjo aferë nuk është vërtetë, MB e drejtuar nga Lleshaj, bëri dhe padi kundër Partisë Demokratike, e cila e denoncoi skandalin që në vitin 2019.

Por, pavarësisht këtyre fakteve, emri i Lleshajt nuk u pa në listën e të akuzurave të SPAK-ut.

Ndonëse në koridoret e politikës, flitet që Lleshaj është nën hetime për këtë çështje, nga ana tjetër flitet edhe për një mbrojtje që SPAK po bën ndaj Lleshajt.

CNA.al ka kontaktuar kreun e SPAK, Arben Kraja, për ta pyetur nëse ish-Ministri i Brendshëm Sandër Lleshaj është nën hetime për këtë aferë korruptive.

Ndërkaq, Kraja, as nuk e ka pohuar, por as nuk e ka mohuar një gjë të tillë.

Ai është mjaftuar me deklaratën, ?dje kemi dhënë një njoftim zyrtar dhe aty janë emrat e personave nën hetim?.

Sipas SPAK, më 11 qershor të vitit 2020, në Agjencisë e Blerjeve të Përqendruara në Ministrinë e Brendshme është zhvilluar procedura e prokurimit për llogari të Autoritetit Kontraktor, Drejtorisë së Përgjithshme të Policisë së Shtetit me objekt ?Blerja dhe shpërndarje e uniformave dhe këpucëve të Policisë së Shtetit,? për katër vjet, me fond limit 2,8 miliardë lekë pa TVSH.

Gjatë hetimit, sipas Prokurorisë së Posaçme, janë konstatuar shkelje të rregullave të prokurimit publik, bërë nga anëtarë të Njësisë së Prokurimit si Flutura Çekrezi, Anisa Bogdani, Ani Omuri, Kleviz Hasani dhe anëtarët e komisionit të Vlerësimit të Ofertave, Kreshnik Bejkaj, Fatmir Femneri, Mariglen Buzali, Gëzim Mingaj, në bashkëpunim me njëri-tjetrin dhe me titullarin e Organit Qendror Blerës, dhe si pasojë kanë sjellë avantazhe dhe privilegje të padrejta në kualifikimin e operatorit fitues në këtë procedurë prokurimi./CNA.al