E fundit!

11:39 Aktualitet

Rama ka ndërhyrë për Ballukun?/ Braho-opozitës: Paraqitini provat në SPAK

Deputetja Elda Hoti në Komisionin për Nismat Qytetare ka d...

14 vite nga vizita historike e Bush në Shqipëri/ Nga takimet me Berishën e Moisiun, te "surpriza" në Fushë Krujë

10 Qershor 2021, 08:46, Politikë CNA

Sot bëhen 14 vite nga vizita historike e ish-presidentit të Shteteve të Bashkuara të Amerikës, George W. Bush në Shqipëri.

Presidenti George W. Bush është bërë presidenti i parë në detyrë i Shteteve të Bashkuara që viziton Shqipërinë.

Më 10 qershor të vitit 2007 dhe bashkëshortja e tij, Laura, u pritën në aeroportin e Rinasit nga ministri i Jashtëm shqiptar në atë kohë, Lulzim Basha.

Bush u takua në Pallatin e Brigadave me presidentin e Shqipërisë, Alfred Moisiu. Presidenti shqiptar Moisiu i dha homologut të tij amerikan dekoratën më të lartë ?Urdhrin e Flamurit?, për kontributin e tij në mbështetje të çështjes shqiptare.

Presidenti amerikan u takua edhe me kryeministrin e atëhershëm, Sali Berisha, ndërsa në një konferencë të përbashkët për shtyp, vlerësoi nivelin e lartë të marrëdhënieve midis Shqipërisë dhe SHBA-së.

Ai tha, se beson se plani i të dërguarit të posaçëm të OKB-së, Marti Ahtisari, për pavarësi të mbikëqyrur, është zgjidhja e duhur për Kosovën, duke theksuar se do të punojë për të bindur gjithë vendet e Këshillit të Sigurimit dhe Serbinë për këtë gjë. Bush vlerësoi lart tolerancën fetare në Shqipëri.

?Shpreha dëshirën që Shqipëria të hyjë në NATO, unë jam përkrahës i kësaj dëshire,? tha presidenti amerikan.

Gjatë qëndrimit në Tiranë, Bush ka folur para trupave shqiptare, një shprehje mirënjohje kjo për Shqipërinë që ka kontribuar ushtarakisht në Afganistan dhe Irak.

?U thashë trupave se ju respektoheni nga ushtarakët tanë si ushtarë të stërvitur mirë dhe kurajozë,? tha Bush. Ai inkurajoi politikanët shqiptarë të punojnë së bashku për të plotësuar standardet e anëtarësimit në NATO.

?Politikanët duhet të punojnë së bashku për të arritur këto standarde, të lënë mënjanë ndryshimet politike,? tha ai.

Vizita e Bush do të mbetet gjatë në kujtesën e shqiptarëve jo vetëm për rëndësinë historike, por më tepër për surprizat e saj, pasi presidenti amerikan thyen rregullat e sigurisë, sidomos gjatë vizitës së papritur në Fushë-Krujë.