Vjedhja e votave/ Ai rasti kur SPAK shikon faktin brenda

27 Maj 2021, 09:47, Politikë CNA

Dje mediat ishin mbushur me lajmin “bombastik” për letrën që SPAK i paska nisur KQZ-së, me anë të së cilës i kërkonte që KQZ ti dërgonte gjithë provat e mbledhura për vjedhje të votave në zgjedhjet e 25 Prillit!

Të dashur lexues të CNA.al: SPAK po tallet!

Mos e merrni seriozisht SPAK kur shkruan e më pas publikon letra me anë të të cilave i kërkon tek KQZ-ja provat e krimeve elektorale të pretenduara nga PD dhe LSI.

Ka që prej më shumë se dy javësh që në seanca publike, tashmë është bërë e qartë nga të gjithë loja e opozitës me ankimimet për vjedhje dhe manipulim të votimeve.

Ka më shumë se dy javë që s’ka mbetur njeri pa parë, dëgjuar dhe kuptuar që, së pari opozita nuk ka depozituar asnjë provë në KQZ për çështje të vjedhjeve që pretendonte.

Së dyti, KQZ në seanca publike ka marrë vendime administrative dhe nuk ka pranuar të bëhet pjesë e lojës së opozitës, për t’u investuar me shkresa drejtuar institucioneve si formë e kërkuar nga opozita për gjetjen e provave të vjedhjes.

Së treti, “dosjet” e prezantuara në KQZ nga opozita, kanë vetëm fotokopje të kallëzimeve penale të bëra nga opozita dhe si të tilla ato janë të gjitha në prokurori.

Vendimet e marra në KQZ flasin qartë që hetimi për vepra penale i takon prokurorisë.

Opozita me kërkesat e veta, thjeshtë synoi përfshirjen e KQZ në një debat publik shterp për vjedhje votash, duke kërkuar që KQZ të investohej për kërkimin e gjërave që as opozita vetë nuk dinte ti listonte. Pretendimi i opozitës donte që të bindte popullin që kësaj rradhe vjedhja e votave qenka bërë nëpërmjet dokumentave zyrtare të prodhuara nga institucionet shtetërore.

Por këto dokumenta, opozita nuk shkonte ti kërkonte dhe ti siguronte vetë, por thjeshtë i listonte çështjet si dëshirë që këto dokumenta si fillim të identifikoheshin nga KQZ.

Pastaj pasi ti identifikonte KQZ, edhe ti kërkonte KQZ nëpër zyrat e shtetit. Pastaj pasi ti mblidhte KQZ, të përpunonte statistikat dhe pasi të përpunonte statistikat, të analizonte veprën, që duhej të ishte penale, se kështu thoshte opozita.

Dhe pasi të arrinte në konkluzione, të formulonte edhe akuzat penale si prokuror, pse jo si SPAK. Pas formulimit të akuzave, të shkonte në gjykatë dhe si SPAK, të kërkonte dënimin.

KQZ me vendime nuk pranoi të bëhej pjesë e lojës dhe i qëndroi kornizës ligjore të funksionimit si organ administrativ.

Kjo është ajo që ka ngjarë në KQZ dhe gjithçka ka ndodhur në sytë e të gjithëve.

Por dje SPAK, i sapo kthyer nga ndonjë udhëtim në hapësirë, i paska kërkuar KQZ-së që kjo ti verë në dispozicion provat e mbledhura për vjedhjen e votave.

SPAK po i rri skenarit të parë?

Atij skenari që parashikonte që KQZ që paguhet si KQZ, të bëhej SPAK, dhe të mblidhte prova (që me sa duket nuk ekzistojnë), për krime zgjedhore.

Që pastaj SPAK që paguhet për të bërë SPAK, të pyeste KQZ-në dhe KQZ ti thoshte: nuk gjeta krime zgjedhore.

Dhe e gjitha kjo shitet si “fillim i hetimeve nga SPAK për akuzat për vjedhje votash“.

Kjo loja me hajde bëjmë sikur, është lojë e vjetër e prokurorisë, dhe sjellja e SPAK dëshmon që mobilimi i zyrave ka ndryshuar, por ca stile të vjetra prokurorësh janë trashëguar nga mobilimi i vjetër.

Me shumë gjasë, pasi SPAK të marrë nga KQZ dosjet me kopje të fotokopjeve të kallëzimeve penale, (të shumëfishuara në 10 kopje për aq qarqe sa janë bërë ankimime), do thotë që nuk ka vepër penale sepse KQZ nuk kishte gjetur vepra penale.

Ka një detaj të vogël që zhvesh hipokrizinë institucionale të SPAK.

Vepra penale e blerjes së votës, nuk është vepër që dëshmohet nga dokumenta zyrtare të administratave shtetërore.

Shit-blerja e votës është nga ato lloje veprash që kërkon veprim interaktiv të SPAK në ditët e zgjedhjeve.

Sepse është një nga ato lloje veprash, ku SPAK duhet të demonstrojë që fakti ishte aty brenda!/ CNA.al