E fundit!

11:00 Aktualitet

Vijojnë përplasjet në kantierin e aeroportit të Vlorës/ Kërkohet ndërhyrja e policisë, reagon Behgjet Pacolli

Vazhdojnë tensionet në kantierin e aeroportit të Vlorës. P...

Çim Gjata, ish-kryetari i KQZ që do certifikojë Lulin si Kryetar të ri

18 Maj 2021, 16:51, Politikë CNA

Çlirim Gjata, ose Çimi siç i thërrasin të gjithë, ishte grupi i gatshëm që zgjodhi Jemini për të zëvendësuar Eno Bozdon në KQZ-në e Lulit.

Për ata që Çimit nuk i mbajnë mend asgjë që mund të ketë thënë, po sqarojmë që Çimi dikur ka qenë Kryetar i Komisionit Qendror të Zgjedhjeve.

Çimi ka drejtuar në atë kohë, një proces, në të cilin besojme që Sali Berisha e kujton akoma shitjen që i bëri Çimi PD-së, nga tavolina e Kryetarit të KQZ-së së Shqipërisë.

Por për stafin e komisionit të zgjedhjeve dhe për procesin zgjedhor, Çimi është i famshëm edhe për dy histori unikale.

Në kohën kur Çim Gjata ishte Kryetar i KQZ, periudha përpara ditës së zgjedhjeve u parapri nga një debat i nxehtë rreth rrezikut të anulimit të zgjedhjeve, për shkak të pamundësisë së furnizimit me fletë votimi nga kompania që kish fituar tenderin e fletëve të votimit.

Sipas kontratave që lidhen me kompanitë që ofrojnë printimin e fletëve të votimit, këto fletë kanë në trup elemente sigurie të ngjashme me paranë. Elementët e sigurisë i bëjnë të pafalsifikueshme fletët dhe si të tilla nuk rrezikojnë shitblerjen e votës dhe manipulimin e rezultatit te votimit.

Fletët kanë elemente që praktikisht e bejnë çdo fletë votimi kopje unike, e pazëvendesueshme dhe e pariprodhueshme.

Tenderi për printimin e fletëve të votimit sigurisht që bëhet kohë më parë nga dita kur KQZ miraton modelin e fletës së votimit dhe më pas ja dërgon atë kompanisë që ka përgatitur formatet për printim.

Por Çimi mendoi Gjatë.

Mendoi aq gjatë dhe aq shumë dhe ndërtoi një mal me problematika duke vonuar miratimin e modelit të fletës së votimit. Aq shumë u mendua Çimi që ta bënte sa më mirë dhe sa më të kuptueshme për votuesit fletën e votimit, saqë detyroi kompaninë që kishte fituar tenderin, që te deklaronte se tërhiqej nga kontrata pasi koha prej 10-12 ditësh e lënë në dispozicion nga Çimi, ishte e pamjaftueshme për lëvrimin e shërbimit dhe dërgimin me sukses të fletëve, 48 orë përpara ditës së zgjedhjeve.

Korrespondenca me kompaninë u nxorr nga vetë Çimi në media për të përgatitur opinionin publik për dështimin e kontratës.

Por Çimi nuk u dorëzua!

Fondi i parashikuar për printimin e fletëve të votimit, nuk mund të digjej! Sepse zgjedhjet duheshin organizuar.

Fletët e votimit u printuan në disa shtypshkronja të vendit. Pa elemente sigurie, thjesht me një numër serie, standart i biletave të urbanit.

Ato zgjedhje u zhvilluan me fletët e votimit të Çimit!

Më pas mandati i Çimit po shkonte drejt përfundimit.

Pas suksesit të arritur me printimin e fletëve të votimit dhe një udhëtim i akorduar drejt Amerikës nuk kish më kuptim.

Cimi kuptoi se nuk kish më kuptim të udhëtonte drejt Amerikës!

Ndaj e zgjidhi shumë thjeshtë. Mori dietat në KQZ sikur do nisej për Amerike dhe u nis për plazh në Jug.

Ngjarja me fletët e votimit në kohën kur KQZ drejtohej nga Çim Gjata dhe shitja e PD në ato zgjedhje nga Çimi, i kujtohet edhe sot Sali Berishës.

E kujtojnë ende edhe në KQZ. E kujtuan sidomos kur edhe në këto zgjedhje, tenderi i printimit të fletëve të votimit rrezikoi të dështonte. Por çdo ngjasim i historisë së Çimit dhe personazheve të tanishëm me atë incident, është i rastësishëm dhe fryt i fantazisë.

Kjo histori e kujtuar sot ka për qëllim vetëm të tregojë se në ç’duar të lara në detin e Jonit, do i lenë demokratët votat e tyre për kryetarin e Partisë Demokratike.

Çimi sot është aty për tenderin e Lul Bashës. Sa për fletë votimi, nga ato ka Lul Basha plot. Ja ka bëtë gati Jeminit!/CNA.al