“Duartrokitësit e humbjes” dhe ringritja e PD-së”/ Lutfi Dervishi: Politika e opozitës një pranim i heshtur i zgjedhjeve

4 Maj 2021, 17:59, Politikë CNA

Analisti dhe gazetari Lutfi Dervishi ka komentuar mbi deklaratën e Partisë Demokratike që nuk do ti njohë zgjedhjet, por që do të hyjë në Parlament.

Ai shprehet se PD do të marrë vendet që ka fituar nga përballja elektorale dhe do të vijojë me denoncime ndaj parregullsive të pretenduara.

Dervishi shton se kreu i PD Lulzim Basha gjatë fushatës i është shmangur pyetjes se çfarë vendimi do të marrë në rast humbjeje duke u shprehur shumë i sigurt për fitoren.

Ai lajmëroi se ditën e sotme në Sonte në emisionin Përballë do të jetë i ftuar ish Presidenti Bujar Nishani i cili do të flasë për leximin që ai ka për humbjen më 25 prill dhe idetë dhe planin për ringritjen e Partisë Demokratike.

Postimi i plotë:
?Duartrokitësit e humbjes? dhe ringritja e PD-së!
Partia Demokratike ka deklaruar se nuk e njeh rezultatin e zgjedhjeve të 25 prillit, por ka përjashtuar mundësinë e bojkotit të Parlamentit të ri që do të konstituohet, pas 4 muajsh më 9 shtator.
E thënë troç, PD do të marrë vendet që ka fituar nga përballja elektorale dhe do të vijojë me denoncime ndaj parregullsive të pretenduara.

Politika e deritanishme e partisë më të madhe të opozitës duket të jetë një pranim i heshtur i zgjedhjeve dhe në të njëjtën kohë një kontestim i zhurmshëm i zgjedhjeve.
Kryetari i PD-së, Lulzim Basha ka paralajmëruar që javën tjetër do të nisë një tur ?faktmbledhës? në rrethe, ndërkohë që gjendet përballë kërkesës së kritikëve për të marrë përgjegjësinë për humbjen e radhës dhe për të dhënë dorëheqjen.

Z. Basha në fushatë i është shmangur pyetjes për vendimin që do të marrë në rast humbje. Ai është shprehur i bindur në fitoren e 25 prillit. Optimizmi për fitoren shoqëroi opozitën deri në momentin e mbylljes së kutive dhe entuziazmi arriti kulmin me daljen e disa exit polleve që paralajmëronin një fitore të opozitës, të paktën në kryeqytet.

48 orë më pas, pa u mbyllur numërimi i votave, por kur u bë qartë se rezultati nuk mund të ndryshohej, u artikulua kërkesa për dorëheqje të kryetarit të PD-së.
Ndërkohë që në grupin e kritikëve të zotit Basha dallohen qartë individë të zellshëm që ?duartrokasin humbjen?, apo dhe individë që nuk kanë më lidhje me PD-në, zëra autoritarë si Bujar Nishani kërkojnë hapjen e një procesi për ringritjen e PD-së!

Bujar Nishani, kryetari i Këshillit Kombëtar të Partisë Demokratike, dhe ish Presidenti i vendit, në deklaratën e parë pas zgjedhjeve foli për dy pengmarrës. ?Edi Rama, -tha ai,- po mban peng Shqipërinë dhe Lulzim Basha tenton të mbajë peng Partinë Demokratike?.
Zoti Nishani në mesazhet e tij publike gjatë kësaj jave ka theksuar se: ?PD duhet të lihet e lirë për t?u ringritur në madhështinë që i takon si Parti e Lirisë dhe Rinisë?.

Sonte në #Përballë ish Presidenti Bujar Nishani do të flasë për leximin që ai ka për humbjen më 25 prill dhe idetë dhe planin për ringritjen e Partisë Demokratike./CNA.al