web counter
LEXO PA REKLAMA!

SHKARKO APP

App Store
Google Play

Falimentimi i shpk Meta-Kryemadhi/ LSI me rol të “vdekur” edhe në Kuvend

3 Maj 2021, 06:48, Politikë CNA

Lëvizja Socialiste për Integrim në këto zgjedhje arriti të merrte vetëm katër mandate në të gjithë vendin.

Dy mandate i mori në Tiranës, një në Fier dhe një në Shkodër. Monika Kryemadhi, kryetarja e LSI-së, ka deklaruar se do të bëjnë opozitë në Kuvend. Por, ky dështim i prodhuar në këto zgjedhje, do të ndikojë edhe në rolin e LSI në Kuvend.

Me 19 mandatet e mëhershme, LSI ishte pjesë e disa komisioneve parlamentare. Por, tashmë një gjë e tillë nuk do të ndodhë më.

Kujtojmë se LSI drejtonte Komisionin Parlamentar të Integrimit dhe atë të Shëndetësisë, përkatësisht me Klajda Gjoshën dhe Petrit Vasilin.

Por tashmë Klajda Gjosha nuk do të jetë më në Kuvend dhe Petrit Vasili është në dorë të Kryemadhit, nëse do të hyjë në Kuvend apo jo.

Për më tepër me katër mandate, LSI nuk krijon dot as grup parlamentar, pasi sipas rregullores së Kuvendit,  duhet 7 deputetë, për të pasur grup parlamentar.

?Brenda 5 ditëve nga data e zgjedhjes së Kryetarit të Kuvendit ose e marrjes së mandatit gjatë legjislaturës, çdo deputet deklaron me shkrim se në cilin grup parlamentar bën pjesë ose deklarimin si deputet i pavarur ose jashtë grupeve parlamentare. Grupi parlamentar formohet nga jo më pak se 7 deputetë. Çdo deputet mund të jetë anëtar vetëm në një grup parlamentar?, thuhet në rregulloren e Kuvendit.

Gjithashtu LSI vetëm me katër deputetë nuk mund të përzgjedhë anëtarë të grupeve të miqësisë me vendet partnere si dhe nga diskutimet për të zgjedhur anëtarët e Byrosë së Kuvendit.

As në Konferencën e Kryetarëve LSI nuk do të ketë përfaqësues. Pra nuk do të mund të bëhet pjesë e vendimarrjes për anxendën e punimeve të Kuvendit.

Këto janë penalitet që do të ketë LSI në legjislaturën 2021-2025, pas humbjes në zgjedhjet e 25 Prillit./CNA.al





Lajmet e fundit nga