Olli rendit synimet e BD/ Thirrje qytetarëve: Rezistojini presionit të momentit!

16 Prill 2021, 17:22, Politikë CNA

Kandidati i Bindjes Demokratike, Leonard Olli ka treguar qëllimet e BD dhe mandatet që ajo synon të marrë.

Në një intervistë për CNA.al ai u shpreh se Bindja si një subjekt i ri politik ka një synim dhe një qëllim madhor, përtej programeve elektorale të paertive të tjera që sipas tij, nuk kanë një qasje të qartë në raport me nevojën urgjente të riformatimit të sistemit tonë kushtetues dhe politik.

?E keni thënë vazhdimisht se Bindja si një subjekt i ri politik, edhe pse më shumë inividë me një përvojë të gjatë në politikë dhe të rinj të talentuar, ka një synim dhe një qëllim madhor. Kjo jo për meritë tonë, po prej faktit se partitë tradicionale, përtej programeve elektorale që mund të jenë mjaftueshëm atraktivë në letër, nuk kanë një qasje të qartë në raport me nevojën urgjente të riformatimit të sistemit tonë kushtetues dhe politik. Është ky moment, që si një parti e qendrës së djathtë, na diferencon nga mjaft subjekte garuese. Më lejoni të përmend disa nga momentet që prek programi ynë.

Sistemi aktual politik rrezikon të asgjësojë demokracinë, në radhë të parë brenda partive politike, e pastaj në çdo qelizë të shtetit, me pasoja të rënda në gjithë shoqërinë shqiptare. Qark i mbyllur, që ka nxitur degradimin intelektual, servilizmin dhe klientelizmin, duke vrarë konkurrencën dhe qarkullimin e elitave politike apo profesionale në vend. Ne jemi të bindur se ndryshimi i parë kushtetues ka të bëjë me zgjedhjet dhe çlirimin e tyre nga makthi i pashait që drejton partinë. Për këtë, kalimi në një sistem proporcional kombëtar me lista preferenciale është një hap i domosdoshëm.

Depolitizimi i plotë i procesit zgjedhor. Ndryshime thelbësore në ligjin ?Për partitë politike?, për të vendosur rregulla të reja dhe të forta lidhur me funksionimin, financimin, organizimin dhe zgjedhjet e brendshme të tyre.
Një ligj të ri ?Për administatën publike?, që të garanton paprekshmërinë e saj nga ndryshimet politike në qeveri, duke përcaktuar qartë rolin dhe vendin e saj gjatë fushatave dhe proceseve zgjedhore.

Ndryshime në ligjin ?Për ndarjen administrative-territoriale të njësive të qeverisjes vendore në Republikën e Shqipërisë?, ligj i cili ka dështuar plotësisht. Një qasje e re që garanton barazinë e palëve në zgjedhje, por edhe një miradministrim të pushtetit lokal të decentralizuar plotësisht dhe të pavarur nga pushteti qendror. Kufizimi i pushtetit të kryeministrit dhe normimi sipas normave europiane të mocionit të besimit apo mosbesimit, që tashmë e kthen çdo kryeminstër në një individ të plotfuqishëm.

Depolitizimi i plotë i Policisë së Shtetit dhe heqja e çdo mundësie politikës për të kaur këtë organizëm jetik për rendin dhe sigurinë publike dhe demokracinë. Krijimin e një ligji organik për Presidentin e republikës, i cili do të normonte një herë e përgjithmonë rolin e tij në një Republikë Parlamentare si edhe rishikim serioz të mënyrës së zgjedhjes së tij, qoftë edhe me votim direkt nga populli. Këto janë disa nga shtyllat e programit tonë politik, të cilat më pas i hapin rrugën realizimit real dhe konkret të çdo projekti ekonomik, në shëndetësi, arsim dhe infrastrukturë. Në këtë kuadër, ne besojmë se pretendimet tona për një deri në dy mandate janë plotësisht reale?, tha Olli.

Më tej ai i drejtoi edhe një mesazh qytetarëve teksa i bën thirrje të votojnë Bindjen Demokratike në 25 prill. Ai bën thirrje të votojnë të lirë dhe me mendje të hapur.

?Unë besoj se gjithë çka thashë më sipër janë arsyet kryesore se përse ata duhet të votojnë Bindjen e tyre më 25 Prill dhe unë besoj se do të kemi një mbështetje surprizë. Mesazhi im gjatë gjithë kësaj fushate ka qenë dhe mbetet: Të nderuar miq, votoni të lirë dhe me mendje të hapur! Votoni për të ardhmen tuaj, familjeve dhe fëmijëve tuaj në mënyrë që të mbetemi këtu të gjithë bashke! Votoni individët me integritet, të cilët nesër do të jenë çdo moment përkrah jush për të mbrojtur të drejtat tuaja!

Rezistojini presionit të momentit se vetëm kështu do shkojmë larg si njerëz të lirë. Mos besoni se interesi individual i momentit do jetë mundësi, pasi kemi 30 vjet që jemi marrë peng nga ky mentalitet. Votoni për lirinë tuaj, sepse vetëm kështu do e fitoni atë dhe çdo të drejtë tjetër që e kemi fituar, por që sot na e shesin sikur na bëjnë nder! Refuzoni politikën djallëzore se ?Shqipëria nuk bëhet me shqiptarë? dhe tregoni se jemi komb me dinjitet që dimë shumë mire të ndërtojmë të ardhmen tonë?, përfundon Olli./CNA.al