Skandali i gjyqtares Fida Osmani/ Jep vendime copy past nga ajri

2 Prill 2021, 21:06, Aktualitet CNA

Gjyqtarja e Tiranës Fida Osmani, është e njohur për publikun, për mënyrën se si ajo i zhvillon gjyqet në ajër, në fluturim, në makinë, ndoshta edhe duke drekuar, duke shëtitur apo kudo tjetër, përveç sallës së gjyqit.

Një gjyqtare që nuk e meriton këtë emër, vijon edhe sot e kësaj dite të jetë pjesë e sistemit të drejtësisë me çekiç në dorë dhe duke zhvatur qytetarët me vendimet e padrejta që jep, ndonëse nuk njihet aspak me problematikën e vërtetë.

Të njëjtën gjë ka bërë edhe ditët e fundit, ku ajo ka padiur gazetarin Adriatik Doçi, për arsyen e vetme se ai ishte i pari që i nxorri të palarat në shesh. Edhe për këtë çështje, Fida Osmani e ka marrë vendimin nga ajri, nga një udhëtim që vetëm ajo e di se ku do shpenzojë paratë e vjedhura.

Vendimin për të dënuar gazetarin, Osmani e ka marrë copy-past, një nga rrugët më të shkurtara për të mos prishur terezinë dhe rehatin ku je. Në arsyetimin e saj, ajo nuk përmend në asnjë rresht emrin e gazetarit, por një tjetër emër, një aktivist i një OJQ-je.

Me dokumente, që shihen qartë pafytyrësia e një pseudogjyqtare, e cila rri në rradhët e sistemit të drejtësisë për të vjelë të ardhura nga persona të ndryshëm, që për një arsye apo më shumë mund të përballen me togat e zeza.

Vetë gazetari, e ka ironizuar vendimin e gjyqtares së Tiranës, duke thënë se do të nisë të shesë sendet personale për të paguar detyrimet që ka vendosur ajo, nëse vendimi do të jetë i drejtë dhe i saktë.

?12 milionë lekë copy-pase

Në 23 shkurt të këtij viti, teksa po ecja rrugëve plot histori të Prizrenit, më njofton avokati im se gjyqtarja Fida Osmani më kishte dënuar me 12 milionë lekë të vjetra, për shkak të shkrimeve të mia denoncuese.

Me njëfarë kureshtje të natyrshme nisa sot të lexoja vendimin.

Gjatë këtyre ditëve, ndërsa dokumenti qëndronte në heshtje mes librave, kisha një parandienjë se gjyqtarja mund ta kishte marrë vendimin kundër meje në avion, siç e ka pranuar vetë para KLD kohë më parë se disa gjyqe i bënte në ajër, me arsyetimin se ‘kush punon edhe gabon’.

Por, nuk ishte kështu. Është diçka që nuk e rrok dot një mendje normale. Shfletova nxitimthi faqet e para me formalitete dhe kalova menjëherë tek arsyetimi.

Në pjesën e arsyetimit mbeta me gojëhapur. Gjyqtarja nuk fliste për mua dhe për paditësin, por për persona të tjerë, rrethana dhe çështje tjetër, për të cilën po lexoja për herë të parë.

Fliste konretisht për Besian Peshën, i cili nuk ka asnjë lidhje me padinë civile kundër meje. Është vështitë për t’u besuar, por unë kam vendimin në dorë me firmën e Fida Osmanit.

Nuk e di çfarë emri t’i vendos kësaj.

Në mendje më vijnë versione të ndryshme. Ndoshta ka qenë e dehur.

Ndoshta ka qenë nën ethet e Vetingut. Ndoshta ia ka shkruar vendimin dikush tjetër.

Ndoshta ka paracaktuar vendimin, duke marrë një vendim të gatshëm, ndërsa ka harruar të zëvëndësojë emrat.

Nuk e di çfarë mund të ketë ndodhur me saktësi.

Dhe për më tepër, përfshirja e Besian Peshës pa asnjë lidhje në pjesën arsyetuese, nuk është ‘perla’ e vetme.

Gjithsesi, si fillim do shes biçikletën për të nisur mbledhjen e parave, nëse një ditë ky vendim, emblemë e drejtësisë që po fundoset dita-ditës, do marrë formë të prerë?, shkruan gazetari Adriatik Doçi.

Në Shqipëri ka nisur reforma në drejtësi, ngritja e organeve të reja dhe vlerësimi i gjyqtarëve dhe prokurorëve. Fida Osmani ende nuk ka kaluar në filtrat e vettingut, dhe mesa duket ajo ka bindjen se nuk do të kalojë, ndaj ka nisur me KÇK, me vendime copy past sepse këto ditë kur rri në ajër dhe jep vendime kot nuk do i vijnë më./CNA.al