SHÇBA drejt shkrirjes/ Projektligji shkon në Kuvend

17 Shkurt 2021, 16:04, Aktualitet CNA

Shërbimi i Çështjeve të Brendshme dhe Ankesave pritet të shkrihet në muajt e ardhshëm. Përmes një projektligji që në 4 mars do të shkojë për miratim në Kuvend, Ministria e Brendshme ka propozuar zëvendësimin e kësaj strukture me Agjencinë e Mbikëqyrjes Policore.

Kjo agjenci do të ketë thuajse të njëjtat kompetenca si SHÇBA vetëm se kreun e saj do e zgjedhë kryeministri me propozim të ministrit të brendshëm.

?Projektligji, pjesë e paketës së reformës për rritjen e parametrave të sigurisë, forcimin e luftës kundër krimit e korrupsionit. Rikonceptim të shërbimit, shtim kompetencash. Objektivat janë më ambicioze, ndaj u reflektua në këtë projekt-ligj të ri. Strukturat që mbikëqyrur agjencia, do të hetohen nga agjencia dhe të jepet vendim për ta nga vetë ata, sigurisht me të drejtë apelimi nga subjekti i ndëshkuar për shkeljen e konstatuar?, u shpreh Elena Pici.

Ndonëse në thelb dy strukturat janë të ngjashme, kreu i komisionit të ligjeve që sot e kaloi në parim projektligjin tha se duhet të shihet me kujdes, pasi në asnjë mënyrë nuk duhet të ketë përplasje me ligjet e tjera.

?Merak e shqetësim është garantimi i subjekteve të ligjit, pasi me këtë projekt-ligj i jepet e drejta agjencisë që të ndërmarrë masa disiplinore ndaj subjektit të ligjit. Ky ligj duhet të shihet në harmoni me kodin e procedurës penale dhe disa ligje të sektorit të sigurisë. Kjo për të mos pasur përplasje apo konflikte ligjore mes ligjeve sektoriale?, u shpreh Ulsi Manja.

Agjencia e Mbikëqyrjes Policore në objektivat e saj do të ketë parandalimin, zbulimin dhe hetimin e shkeljeve administrative dhe veprave penale në Policinë e Shtetit, Gardën e Republikës dhe Shërbimin e Mbrojtjes nga Zjarri dhe Shpëtimi.

Agjencia do të ketë rol në inspektimin, shqyrtimin dhe trajtimin e ankesave, procesin e Vetingut në polici për gradat e ulëta si dhe verifikimin e punonjësve mbi plotësimin e kushteve për pajisjen me certifikatë sigurie.

Risi do të jetë edhe përdorimi i testit të poligrafit e njohur si makina e të vërtetës që për herë të parë u aplikua në garën për kreun e Byrosë Kombëtare të Hetimit./CNA.al