10 vjet nga ngjarja e 21 janarit/ Përmeti: Mos u gënjeni, të tre janë bashkë dhe njësoj

21 Janar 2021, 10:03, Politikë CNA

Deputeti i Bindjes Demokratike Andi Përmeti ka reaguar për ngjarjen e 10 viteve më parë, ku në 21 janar të vitit 2011 humbën jetën katër qytetarë në protestën e thirruer nga Edi Rama, kundër Ilir Metës.

Përmes një postimi në rrjetin social Facebook, Përmeti u shpreh se ata të tre janë bashkë dhe janë njësoj.

Sipas tij, Lulzim Basha i cili në atë kohë ishte në krye të Ministrisë së Brendshme moralisht duhet të kishte dhënë dorëheqjen dhe të mos ishte më pjesë e politikës, duke shtuar se jo vetëm që kjo gjë nuk ndodhi, por Basha ka bërë edhe marrëveshje personale me Edi Ramën, personi i cili i nxorri në shesh qytetarët.

Ndërsa duke iu referuar Ilir Metës, Përmeti shprehet se ai ishte arsyeja pse shqiptarët u ngritën në protestë.

?Mos u gënje, janë të tre njësoj, janë të tre bashkë!

(21 janar 2011-21 janar 2021)

Mos u gënje: Lulëzim Basha, kryetari i opozitës sot, ishte Ministër i Brëndshëm në 21 janar 2011. Katër qytetarë u vranë në shesh duke protestuar. Moralisht duhej të kishte dhënë doreheqjen dhe sot të ishte jashtë politikës. Faktikisht është pretendent për kryeminister dhe ka bërë dy marrëveshje personale me Edi Ramen, personin i cili i nxorri në shesh qytetarët dhe një marrëveshje me Ilir Meten, personin që qytetaret dolën në shesh për të rrëzuar.

Mos u gënje: Edi Rama, personi që nxorri qytetarët në shesh, në protesten më të dhunshme te 22 viteve te fundit, fitoi karrigen e kryeministrit duke u betuar se do bënte drejtësi për gjakun e të vrarëve. Në 8 vite pushtet absolut jo vetëm nuk beri drejtësi por bashkëqeverisi 4 vite me Ilir Meten, personin për të cilin i nxorri në shesh këta njerëz dhe në fund te 4 vjecarit votoi dhe bëri Ilir Meten president të Shqipërisë. Dhe nuk u mjaftua me bashkëqeverisje por komandantin e grupit të zjarrit te gardes e bëri kryetar bashkie?, shkruan Përmeti.

Deputeti i Bindjes Demokratike më tej shtoi se Meta ishte personi i cili u kap me zë dhe figurë i përfshirë në korrupsion, duke theksuar se jo vetëm që nuk është dënuar, por vijoi të qëndronte në qeveri, kur bëri koalicion me Ramën.

?Mos u genje: Ilir Meta personi i kapur me figurë dhe zë duke kryer korrupsion jo vetëm që nuk është në burg por vazhdoi të qëndronte në qeveri (me partine e tij) mbasi katër qytetare u vranë në protesten per te larguar atë dhe më pas bëri koalicion dhe qeverisi 4 vite pikërisht me Edi Ramen, personin i cili nxorri qytetarët ne shesh per te larguar ate.

Mos u gënje, janë të tre njesoj, janë të tre bashke?, shkruan Përmeti./CNA.al