"Largimet" e eksponentëve të LSI/ Tradhti apo marrëveshje?

17 Janar 2021, 13:40, Aktualitet CNA

Prej ditësh, mediat në vazhdimësi po “informohen” dhe informojnë më pas për “transferime” të eksponentëve të LSI-së tek partitë e mëdha.

CNA.al ka vëzhguar atë që duket sikur po ndodh.

Ish-deputetë dhe ish-ministra të qeverive “Berisha” e më pas “Rama”, një nga një (dhe pa qëlluar 2 në një ditë), njoftojnë kapërcimin me PS! Nga mënyra si po pozicionohet fushata e Ramës, dallohet qartë strategjia e tij. PD-në po e sulmon me ato çka PD-ja e vërtetë prej të paktën 7 vitesh ka deklaruar kundra Bashës.

Gjen sot rëndom në instagramin e Ramës, copëza sinkronesh nga deklarata të Topallit, Patozit, Imamit, Rulit e të tjerëve kundra Bashës. Të gjitha të shoqëruara nga Rama me batutën e rradhës.

Nga ana tjetër, Rama ka zgjedhur që LSI-në ta sulmojë drejtpërdrejtë, duke e identifikuar me Ilir Metën e duke injoruar Monikën. Nuk është strategji e keqe. Ndërkohë e gjitha shoqërohet me transfertat e lojtarëve të mëdhenj të LSI-së.

Sipas një rradhe që duket si e bërë me regji qendrore dhe sipas një kalendari të hartuar mirë, që vëmendja e spektatorit elektorat të rrijë në të njëjtën temë.

E nisi Nasipi, pasi e ftoi Lefteri!

Tani duket sikur e vijojnë të tjerë që nuk thonë më se kush po i fton! Deri tani të gjithë kanë deklaruar kapërcimin tek PS, por mos u habisni që të fillojnë dhe kapërcimet me PD. Kështu mund të ndodhë me Edmond Haxhinaston për shembull.

Meqë Rama nuk i mban dot në një listë dy krushq, për krushqi të mundshme pas zgjedhjeve, krushqit duhen një andej e një këtej. Që më pas ky këtej të dalë në video me Ramën e ti bëjë ftesa atij andej që ai të bindi palën, për krushqinë e madhe me të gjitha palët.

Nëse në analizën tonë shtojmë gjithë arsyetimin për skemën e Dushkut2021 që e ka lançuar e para Monika (ngaqë kurajoja ka emër gruaje), e vijoi Luli dhe po e shoqëron me heshtje Rama.

Duket si marrëveshje për ta ringjallur Metën pas vdekjes së LSI. Mbase me një sigël tjetër, por në çdo rast me bekimin e Ramës, ndaj të cilit Meta më pas duhet të shfaqet mirënjohës. Deri tani dimë eksponentët e LSI që po “ftohen” në PS.

Me shumë gjasë në lista të PD do kemi eksponentë të LSI. Ndërkohë që Meta hesht dhe nuk shprehet kundra transfertave, e gjitha ka veç një shpjegim: ata që po “ikin” i duhen atje ku po shkojnë. Nasipi duhet në listën e PS-së, sepse LSI tashmë është sigla e mallkuar nga të gjithe e nën atë sigël s’ka Nasip që del deputet. Haxhinasto duhet në listën e PD-së sepse LSI tashmë është sigla e mallkuar nga të gjithe e nën atë sigël s’ka Haxhi që del deputet.

Fundja demokratët kanë 20 vjet që hedhin vota nën siglën PD për çun e ju del goc. Ja kanë marrë dorën./CNA.al