Mega operacioni anti-drogë në Skrapar/ Policia jep detaje

8 Janar 2021, 12:32, Kronika CNA

Policia e Shtetit ka dhënë detaje për operacionin anti-drogë në zonën e Skraparit, ku janë ekzekutuar 22 masa sigurie, ndërsa një tjetër është shpallur në kërkim. Operacioni i koduar ?Gjergjova? është finalizuar pas 7 muajsh hetime.

Sipas policisë, nga hetimet e kryera nga Drejtoria Hetimore Qendrore në Departamentin e Policisë Kriminale në Policinë e Shtetit dhe Policia Gjyqësore në Shërbimin për Çështjet e Brendshme dhe Ankesat, nën drejtimin e Prokurorisë së Posaçme, janë administruar prova nga të cilat ka rezultuar se një grup personash, të cilët vepronin në zonën e Skraparit, kanë kryer veprat penale ?Kultivimi i bimëve narkotike?, ?Prodhimi dhe shitja e narkotikeve?, kryer në formën e grupit të strukturuar kriminal, si dhe veprën penale ?Pastrimi i produkteve të veprës penale apo veprimtarisë kriminale?.

Gjithashtu, sipas uniformave blu janë dokumentuar veprime të kundërligjshme të kryera nga disa punonjës të Komisariatit të Policisë Skrapar, të përfshirë në këtë aktivitet kriminal.

Më herët Prokuroria e Posaçme Kundër Korrupsionit dhe Krimit të Organizuar njoftoi sot se ka lëshuar 23 urdhër arreste për kultivim lëndësh narkotike.

SPAK tha se janë dokumentuar verpime të kundraligjëshme të kryera nga disa punonjës të policisë të Komisariatit të Policisë Skrapar, të përfshirë në këtë aktivitet kriminal dhe konkretisht punonjësit e policisë Neritan Naska (Shef i Stacionit të Policisë Poliçan), Klement Zeqo, Bardhyl Çela, Astrit Duro me detyrë punonjës policie, si dhe funksionarët publik, shtetasi Edmon Zotko me detyrë Administrator i Njësisë Administrative Tërpan, Fatos Lamaj, me funksion Kryeplak i fshatit Çorrogjaf, të cilët në bashkëpunim me njëri tjetrin, sipas funksioneve dhe roleve, me veprime dhe mosveprime, kanë lejuar kultivimin e bimëve narkotike në territorin ku ushtrojnë detyrat funksionale dhe kompetencat, si dhe kanë favorizuar autoret që kanë kryer kultivimin e bimëve narkotike./CNA.al