Humbja e profesorit Dion Tushi/ Universiteti i Korçës mesazh ngushëllimi: La gjurmë të pashlyeshme

1 Janar 2021, 21:21, Aktualitet CNA

Universiteti i Korçës “Fan S. Noli”, ka reaguar për lajmin e hidhur të ndarjes nga jeta të pedagogut Dion Tushi, i cili humbi jetën aksidentalisht.

Universiteti i Korçës rendit arritjet e Tushit në karrierë për gjatë gjithë viteve të jetës së tij dhe tregon për mënyrën se si ai është rritur.

Gjithahstu universiteti i ka shprehur ngushëllimet familjes së pedagogut për ndarjen nga jeta të njeriut të dashur e prindit të urtë.

?U nda nga jeta në mënyrë të papritur, prof. As. Dr. Dion Tushi pedagog i universitetit ?Fan S. Noli?, Korçë

Në datën 1 janar 2021 u ndaj nga jeta, krejt papritur, në moshën 49 vjeçare, prof. as. dr. Dion Tushi, pedagog pranë Departamentit të Gjuhës dhe Letërsisë në Fakultetin e Edukimit dhe Filologjisë, në Universitetin ?Fan S. Noli?, Korçë.

Dion Tushi lindi në qytetin e Korçës më 18.9.1971. Në qytetin e lindjes, me tradita në kulturë dhe në fushën e mësuesisë, kreu shkollën fillore dhe atë të mesme. Ndoqi studimet e larta dhe u diplomua në degën e gjuhës shqipe e të letërsisë në Universitetin ?Aleksandër Xhuvani?, Elbasan.

Në vitin 1999 merr titullin ?Doktor i Shkencave? në Universitetin Shtetëror të Athinës. Prej vitit 2013 mbante titullin ?Profesor i Asociuar?. Dha një kontribut të shënuar si në rritjen e zhvillimin e Universitetit të Korçës, ashtu edhe të veprimtarisë shkencore të Departamentit të Gjuhës e të Letërsisë, sidomos në fushën e shkencave filologjike.

Veprimtaria e tij kryesore kërkimore shkencore përfshin fushën e letërsisë, me fokus letërsinë botërore dhe atë antike në veçanti. Ka botuar: ?Efigjenia në Tauridë? , Përkthim nga origjinali i veprës së Euripidit, i shoqëruar nga një studim (2009), ?Letërsia e Huaj e Shekullit XX? (2012).

Prof. as. dr. Dion Tushi është autor i mjaft punimeve shkencore, mbi filologjinë, kulturën shqiptare dhe filozofinë, të publikuara në gjuhën shqipe dhe në gjuhë të huaja. Gjithashtu, ai është pjesëmarrës në mjaft konferenca shkencore të organizuara brenda dhe jashtë vendit.

Me punën e tij të frytshme, shkencore dhe pedagogjike, profesor Dion Tushi la gjurmë të pashlyeshme në formimin e studentëve për vite të tëra. Ai u nda nga jeta në një kohë kur ishte i angazhuar në projekte të reja shkencore dhe botuese të fushës ku vepronte. Largimi i tij i parakohshëm nga jeta është humbja e një pedagogu dhe një kolegu të dashur për botën akademike, në veçanti për Universitetin e Korçës. Për Korçën, është humbja e një intekektuali të shquar dhe një qytetari model. Për familjen është humbja e bashkëshortit dhe babait të përkushtuar.

Universiteti i Korçës në emër të stafit dhe të studentëve i shpreh familjes së prof. as. dr. Dion Tushit ngushëllimet më të sinqerta e të thella për ndarjen nga jeta të njeriut të dashur e prindit të urtë.

Lamtumirë kolegu dhe pedagogu ynë i dashur, profesor Dion Tushi!?, thuhet në deklaratën e Universitetit të Korçës./ CNA.al

Humbje e madhe për arsimin/ Ndahet nga jeta aksidentalisht profesori Dion Tushi, ja CV e tij e pasur