Shpërblimi i qeverisë për pensionistët/ PD: Qesharake, në 7 vjet Rama ka sjellë vetëm dështim

21 Dhjetor 2020, 11:06, Politikë CNA

Eksperti i ekonomisë në Partinë Demokratike Dorian Telhiti e ka cilësuar qesharak shpërblimi ne qeverisë për pensionistët, duke e akuzuar kryeministrin Edi Rama se në 7 vite u ka sjellë shqiptarëve vetëm rrënim ekonomik.

Përmes një postimi në rrjetin social, ai shkruan se pas 7 vite dështimesh, ajo që mund të ofrojë Rama gjithnjë e më shumë dështime ndaj është koha për ndryshim dhe për një kapitull të ri në 25 prill.

?Rama, një histori 7-vjeçare dështimesh e premtimesh të rreme. Në radhë e të dëshpëruar, 670 mijë pensionistë shqiptarë të mbetur në mëshirë të një shpërblimi qesharak prej 50 mijë lekësh.

Të patrajtuar financiarisht dhe të harruar nga qeveria e klientelës, pensionistët janë të detyruar të presin lëmoshën e qeverisë. Shqipëria ofron ndihmën më të vogël ekonomike për qytetarët e saj ? më pak se çdo vend i botës.

Për 7 vite, Rama u ka sjellë shqiptarëve vetëm rrënim ekonomik, rritje të kostos së jetesës, shtim të papunësisë dhe rrënim të sistemit shëndetësor. Kosto e jetesës po rritet çdo ditë. Këtë vit çmimet e ushqimeve janë rritur me 4.7%, duke shkaktuar një humbje të fuqisë blerëse të pensionistëve prej rreth 100 mijë lekësh të vjetra. Pensionistët e shohin këtë shtrenjtim të jetesës kudo, në supermarkete, dyqane ushqimore, në farmaci.

Kjo është e turpshme! Boll më me Ramën!

Gjëja e fundit që i intereson atij dhe qeverisë së tij jemi ne qytetarët e Shqipërisë. Pas 7 vite dështimesh, ajo që mund të ofrojë Rama gjithnjë e më shumë dështime. Është koha për ndryshim. Ndryshim për pensionistët, të rinjtë e të rejat, bizneset, ata që kanë humbur vendin e punës dhe ata që mezi po e mbajnë punën. Ndryshim për të gjithë shqiptarët që duan një jetë më të mirë.

Është koha që më #25prill të nisim një kapitull të ri të udhëtimit tonë të përbashkët?, shkruan Telhiti./CNA.al