Gjimshiti u bë lider te Atalanta prej… Ronaldos

16 Dhjetor 2020, 16:01, Sport CNA

Berat Gjimshiti është sot shtylla kryesore e prapavijës së Atalantës. Dhe të mendosh se nuk ishte kështu deri 2 vite më parë? Ndonëse mbrojtësi zbarkoi në Bergamo që në janarin e vitit 2016 nga Zyrihu, me shpresa të mëdha, fillimisht zikaltrit vendosën që ta dërgojnë në huazim që të bënte eksperiencë, me disa huazime tek Avelino e Benevento, derisa Gjimshiti të rikthehej në verën e vitit 2018 që të bënte fazën përgatitore nën urdhrat e Gasperinit.

Madje, ky i fundit jo vetëm që këmbënguli në klub që mund ta shisnin, pasi nuk e kishte pjesë të planeve, por as që e llogariste si titullar. Dhe kur të gjithë prisnin një transferim të mbrojtësit të Kombëtares shqiptare në Rusi, papritur Varnier dëmtohet dhe Gasp e gjen veten pa mbrojtës teksa merkatoja ishte mbyllur.

Kjo bën që Gjimshiti të qëndrojë në Bergamo dhe të nisë të luajë madje me vazhdimësi. Ndeshja e parë e madhe e 27-vjeçarit në vitin 2018 si titullar ishte pikërisht ajo me Juven, më 26 dhjetor 2018, vit që përkoi edhe me zbarkimin e Ronaldos në Torino, por portugezi atë takim u la në stol. Dhe ajo sfidë nuk mund të ishte më e dobët për Beratin: ende pa u kronometruar minuta e dytë, autogol në portën e mbrojtur nga Etrit Berisha, por Atalanta reagon dhe përmbys gjithçka me dopietë të Zapatës. Në fund, Alegri hedh në fushë Ronaldon dhe portugezi barazon, duke i rrëmbyer kohën pikërisht shqiptarit për vulosjen e 2-2.

Siç mund të mendohej, kritikat vërshuan, por në mënyrë të pamenduar, trajneri Gasperini e mbron shqiptarin, sheh rritje tek ai dhe më 30 janar 2019 Gjimshiti ia shpërblen me kryeveprën e karrierës së tij. Sërish në Bergamo luhej ndeshja e Kupës me Juventusin: 3-0 për Atalantën, një shpartallim total për bardhezinjtë, por më shumë sesa rezultati bën jehonë paraqitja fenomenal e shqiptarit: ?Gjimshiti zhduk nga fusha e lojës Kristiano Ronaldon? titullonin thuajse të gjitha mediat në Itali dhe nga aty, jo vetëm Berati që fitoi vetëbesim, por bindi totalisht edhe Gasperinin, i cili nga ajo periudhë e ka titullar të padiskutueshëm dhe madje sot, vlera e kartonit të tij prek 15 milionë eurot.

Falë Ronaldos (është një mënyrë të thëni), Gjimshiti arriti të bëjë kthesën e madhe të karrierës, pasi me paraqitjen e tij fenomenale thuajse saktësisht 2 vite më parë ai u konsolidua si titullar tek Atalanta, po shijon Champions-in me bergamaskët dhe madje po tërheq edhe vëmendjen e klubeve të mëdha, si për shembull atë të Milanit, që në merkaton e verës e kishte vënë seriozisht në shënjestër.