PD drejt një përplasje me Metën?/ Kur do të flasë Albana Vokshi?

24 Gusht 2020, 12:09, Politikë CNA

Më 30 korrik u zhvilluan zgjedhjet në universitetet publike, proces në të cilin u zgjodhën drejtuesit e rinj të këtyre institucioneve.

Në lidhje me zgjedhjet në universitete ka pasur mjaft akuza dhe qëndrime nga ana e Partisë Demokratike, ku një ndër zërat që ka folur më shumë dhe ka kundërshtuar këtë proçes është ish-deputetja Albana Vokshi.

Në disa dalje mediatike, ish-deputetja Vokshi i ka cilësuar zgjedhjet në universitete si të manipuluara.

Në një dalje për mediat, në 1 korrik, Albana Vokshi i ka cilësuar moniste zgjedhjet që do të zhvilloheshin në Universitete më 30 korrik.

Ajo tha se Rama ka qëllim kriminal dhe duke rrezikuar shëndetin e pedagogëve dhe studentëve, kërkon të kapë Universitetin. Më tej Vokshi thekson se zgjedhjet universitare të 30 korrikut pritet të jenë si ato politike të 30 qershorit, ku Rama do të kapë institucionet duke vënë njerëzit e tij.

Sipas ish- deputetes, po tentohet të bëhet atë që nuk e bëri dot Shullazi 4 vite më parë, por kësaj radhe me një vendim antikushtetues, të nënshkruar nga vetë ministrja e Arsimit, Besa Shahini.(Lexo këtu)

Një ditë para mbajtjes së zgjedhjeve, Vokshi deklaroi se disa komisione zgjedhore janë pa legjitimitet dhe me mandat të mbaruar, ndërsa theksoi se pedagogëve u është hequr mundësia të bëjnë fushatë, për shkak të pandemisë.

Sipas saj, ?Këto padrejtësi dhe paligjshmëri burojnë nga urdhri i Ministres së Arsimit për të zhvilluar më 30 korrik zgjedhje farsë në universitete.?.(Lexo këtu)

Ndërkohë, në datën 30 korrik, ditën që u mbajtën zgjedhjet, Vokshi doli sërish e tha se zgjedhjet ishin farsë, si zgjedhejt vendore të 30 qershorit 2019. Sipas Vokshit zgjedhjet ishin pa garë dhe fituesit e paracaktuar. (Lexo këtu)

Por, çfarë ndodhi?

Ndërsa në zgjedhje morën pjesë 90% e pedagogëve shumë prej të cilëve të atashuar pranë Partisë Demokratike, disa prej tyre për më tepër janë zgjedhur shefa departamentesh në fakultete dhe anëtarë të senateve të universiteteve.

Pra, shumë prej atyre që u shpallën fitues të këtyre zgjedhjeve, janë njerëz pranë Partisë Demokratike.

Ndërkohë sot ka dalë edhe presidenti i Republikës, Ilir Meta, i cili ka dekretuar zgjedhjet e manipuluara, sikurse pretendon vetë ish-deputetja e PD-së. (Lexo këtu)

Por, tani lind pyetja, a do bëjë ndonjë deklaratë Albana Vokshi që presidenti dekretoi zgjedhjet?

Kur do dalë Albana Vokshi të flasë kundër presidentit që po dekreton zgjedhje të manipuluara?

Zonja është përtej qesharakes. Si mund të dalësh e të thuash se janë zgjedhje të manipuluara, më pas e fitojnë njerëzit e PD-së, dhe hesht kur ato dekretohen.

Tani ose zgjedhjet janë të manipuluara ose Albana Vokshi dhe Republika e Re kanë bërë shantazh për këto zgjedhje, me stilin që në rast se do të humbnin njerëzit që ata mbështesnin ta vazhdonin betejen për ta kthyer në kauzë politike. E në rast se do të fitonin, do të heshtnin.

Dhe në fakt kështu ka ndodhur, ata fituan, Albana Vokshi ka heshtur, presidenti po i dekreton ndërsa Albana Vokshi po hesht.

Por, meqë po hesht, Albana Vokshi mund të bëjë një veprim tjetër. Mund të shkojë edhe në Presidencë e të marrë pjesë formalisht në proçedurë./ CNA.al

Opozita i kundërshtoi/ Meta dekreton rektorët e rinj të Universiteteve, ceremoni në Presidencë