Ekonomia e Shqipërisë 'në vend numëro'/ Varet nga bujqësia, rajoni zgjeron prodhimin

16 Qershor 2020, 11:16, Ekonomi CNA

Në dy dekadat e fundit, nga viti 2000 deri më 2017, struktura e ekonomisë shqiptare dominohet nga bujqësia, një tregues që lajmëron se Shqipëria, ndryshe nga vendet e tjera të Ballkanit Perëndimor, do ta ketë më të vështirë të rrisë produktivitetin dhe të arrijë standardet e BE-së edhe për shumë dekada të tjera, thotë një studim i Forumit Ekonomik të Vjenës, në lidhje me produktivitetin në rajonin tonë.

Studimi krahasimor, që u botua këto ditë, tregon se pothuajse në të gjitha vendet e rajonit, prodhimi është një nga tre sektorët më të mëdhenj të ekonomisë, Shqipëria bën përjashtim nga kjo renditje. Tre sektorët më të mëdhenj të ekonomisë shqiptare, janë bujqësia me 20% të PBB-së, ndërtimi me 14% dhe tregtia me 13,5%.

Në Serbi, sektori i prodhimit, i përfaqësuar nga fabrikat, zë 20% të ekonomisë; i dyti, sektori i tregtisë, me 11%; i treti, sektori i pasurive të paluajtshme me 11,3%.

Në Bosnjë dhe Hercegovinë, Kosovë dhe Mal të Zi sektori i tregtisë me shumicë dhe pakicë zë pjesën më të madhe të vlerës së shtuar, me rreth 15%. Në Bosnjë dhe Hercegovinë, prodhimi renditet sektori i dytë më i madh në ekonomi, ndërsa në Malin e Zi, sektori i bujqësisë dhe administratës publike janë më të mëdhenj në PBB pas tregtisë.

Në Kosovë, sektori i tregtisë, zë vendin e parë për peshën në PBB, me 14,8% të totalit, ndërsa sektori i bujqësisë vjen e dyti me 13,1% të peshës në PBB. I treti renditet sektori i prodhimit me 13,1% të PBB-së.

Maqedonia e Veriut bën përjashtim nga trendi rajonal, sepse sektori i saj i pasurive të patundshme gjeneron pjesën më e madhe e vlerës së shtuar, me 14.4%, prodhimi dhe sektori i tregtisë me shumicë dhe pakicë vijnë përkatësisht në vendin e dytë dhe të tretë me 13.4 dhe 11.4% respektivisht.

Në Shqipëri sektori i prodhimi, fabrikat, zënë vetëm 6% të ekonomisë, duke e renditur Shqipërinë si vendin me përmirësimin më të ulët të produktivitetit të saj në dy dekadat e fundit.

Ekspertët e Vjenës ndajnë vlerësimin se pjesa e industrisë prodhuese shihet si sektori më i rëndësishëm për zhvillimin e produktivitetit. Studimi tregon se gjatë dy dekadave të fundit vendet në rajon janë duke e orientuar ekonominë e tyre nga prodhimi, përveçse në Shqipëri, ku ekonomia e saj vijon të dominohet nga bujqësia./Monitor