"Unë pi çfarë të dua", Ronaldo me “Cola” në stërvitje, Gigs: Ja si e përplasa në mur

11 Qershor 2020, 12:59, Sport CNA

E lehtë të imagjinosh një mëngjes në mensën e Mançester Junajtidit të Sër Aleks Fergusonit. Ushqime të shëndetshme, futbollistë të kujdesshëm për të grumbulluar energji për stërvitjen. Dhe pastaj mbërrin dikush me një kanoçe “Coca-Cola”, i cili përfundon i përplasur në mur nga njëri prej senatorëve të skuadrës. Kur trajneri aktual i “Djajve”, Solskjaer, ia kishte treguar shokut të kombëtares Fjortoft këtë incident, dukej si një prej përplasjeve klasike në dhomën e zhveshjes.

Kristiano Ronaldo i ri që pinte një pije të gazuar përpara mëngjesit dhe Rajan Gigs e paralajmëronte me agresivitet për të mos e bërë diçka të tillë. Ajo pije “e ndaluar” përpara një mëngjesi në qendrën stërvitore “Carrington” për pak sa nuk ndezi një sherr mes Rajan Gigsit dhe Kristiano Ronaldos. Ole Gunar Solskjaer tregoi se uellsiani i zemëruar e mbështeti në mur portugezin e ri kur e pa se po afrohej me një kanoçe “Coca-Cola” në dorë.

I pyetur sot për atë incident, trajneri i Uellsit thotë gjatë një interviste për “Podcast United”: “Ndoshta, por nuk më kujtohet nëse e mbështeta në mur. Mund t’i kem thënë që ne nuk pimë këto lloj pijesh këtu dhe më pas ai hyri në fushë dhe shënoi një tripletë e në fund më tha: ‘Unë pi çfarë të dua Gigs!'” Në skuadrën e Sër Aleks Fergusonit disiplina ishte e hekurt dhe Gigs, i cili luajti deri në moshën 40-vjeçare, përfitoi pikërisht prej sakrificave që bënte në këtë drejtim.

“Unë e dashuroj çokollatën dhe gjalpin në tost. Kur nuk luaja mirë, ndihesha pak i ngathët dhe vendosja t’i ndërprisja totalisht. Nëse luaja mirë dhe haja shumë gjalpë, vazhdoja ta bëja. Nuk ishte fizike, ishte psikologjike. Haja çokollatë derisa shënova”, thotë 46-vjeçari. Një lojtari që luajti 963 ndeshje me fanellën e “Djajve” dhe fitoi 13 tituj kampion dhe 2 Champions, mund t’ia toleronte vetes gjithçka. Por jo Kristiano në ato vite…