web counter
LEXO PA REKLAMA!

SHKARKO APP

App Store
Google Play

E fundit!

x

Adriatik Alimadhi lë spitalin pas 49 ditësh/ Deputeti rrëfen si e rikthyen mjekët në jetë

14 Maj 2020, 14:14, Politikë CNA

Deputeti i opozitës Adriatik Alimadh ka lënë sot spitalin pas 49 ditësh betejë me koronavirusin e ri.

Lajmin e ka bërë të ditur vetë deputeti, i cili deklaron se momentet më të vështira për të ishin kur u mbylli ditën e parë në dhomën e spitalit.

Në një postim në rrjetet sociale, ai tregon betejën e gjatë dhe të vështirë me këtë armik të padukshëm dhe përpjekjet e stafit mjekësor.

“Hyrja në pavion, infermierja, dy bidona ujë gjysmë litri. 97 herë të përdorura gjithë natën. Aspak gjumë. Mbi qindra herë i shpuar nga gjilpërat, sa nuk mbanin më damarët. Kur u përkeqësova në Spitalin Infektiv me bllokimin e frymëmarrjes, nuk ngopesha edhe me 2 burime oksigjeni. Përdora oksigjenin e vëllait tim Fatosit, pra 30 litra oksigjen. Ndërhyrja e doktoresh Nevilës më ktheu në jetë.

Moment tjetër shumë i vështirë kuptohet ishte kalimi për në reanimacion. Te urgjenca e spitalit  ‘Shefqet Ndroqi’ erdhi vetë drejtori, z. Perlat Kapisyzi, i cili mu prezantua. 5 ditët më të vështira në reanimacion në gjendje jo të mirë shëndetësore. Ditën e 8 lashë reanimacionin në një gjendje më të mirë shëndetësore. Pas 35 ditësh u çova në këmbë.

Pas 37 ditësh lava gojën. Pas 45 ditësh lava trupin dhe fillova të ecja me ngadalë dhe trupi po çlirohej nga dita në ditë. 49 ditë pa dalë nga spitali. Kafen e parë pas 50 ditësh e piva në zyrën e Profesor Perlat Kapisyzi drejtor i spitalit Shefqet Ndroqi, një burrë Babaxhan”, shkruan ai në rrjetet sociale.

Deputeti falenderon të gjithë stafin e doktorëve, reanimatorëve, infermierëve, sanitareve dhe shefen e reanimacionit Alma Cani. Falenderimet e tij shkojnë edhe për një pjesë tjetër të stafit që është kujdesur për të gjatë 49 ditëve.

“Punonte në grup me staf të konsoliduar por dhe shumë njerëzor. Një falenderim dhe mirënjohje për doktoreshë Silvana Bala, për këshillat mjekësore dhe ndjekjen nga afër ndaj meje e cila më priti dhe bëri daljen time sot në spitalin Sanatorium ‘Shefqet Nqroqi’. Respekt dhe mirënjohje për drejtorin e spitalit ‘Shefqet  Ndroqi’ Perlat Kapisyzi me gjithë stafin e tij. Të përkushtuar dhe profesionalisht të aftë. Çdo ditë vizita dhe me kartelë në dorë tek pacienti. Kjo e bënte më të besueshme marrëdhënien doktor-pacient. Personalisht mendoj se është shumë e dobishme në ecurinë e shërimit të një të sëmuri, e cila ka ndikuar edhe të unë!”, nënvizon Alimadhi./ CNA.al





Lajmet e fundit nga