Shehi: Kampionati me 10 skuadra është më i fortë, të nisim sa më shpejt

4 Maj 2020, 08:45, Sport CNA

Për afro dy muaj, për shkak të pandemisë ?COVID-19? futbollistët dhe i gjithë spektri sportiv nuk ka patur mundësi të dalë në fushën e blertë për t?u stërvitur. E tashmë ka ardhur koha që kampionati të rinisë sa më shpejt, sepse është e pamundur që të vazhdohet stërvitja në izolim, natyrisht duke zbatuar protokollet dhe rregullat e vendosura nga institucionet përkatëse.

I këtij mendimi është trajneri i Kukësit, Orges Shehi, i cili në intervistën e dhënë për ?Panorama Sport?, flet për gjendjen e karantinës dhe stërvitjet e vështira, vazhdimin e garës dhe konkurrimin për titull. Kukësi ka shumë lojtarë jashtë vendit dhe sipas vendimeve të qeverisë, ata duhet të karantinohen për 14 ditë, gjë e cila është shumë e vështirë për trajnerin, pasi futbollistët kanë status dhe regjim tjetër ushqimor dhe do ishte mirë ta kryenin në shtëpitë e tyre ose në një hotel që do e caktonte klubi.

Po bëhen dy muaj që nuk luhet futboll, çfarë duhet të ndodhë tashmë?
Unë kam dëshirë që të rikthehemi sa më parë dhe të luajmë. U bë kohë e gjatë që është ndërprerë kampionati dhe tashmë duhen marrë masat edhe për më tej.

Konkretisht futbolli mund të luhet. Nëse zgjat situata, sa e vështirë do jetë për lojtarët?
Kampionati duhet të rifillojë, kanë kaluar dy muaj dhe është një kohë shumë e gjatë. Natyrisht, do të jetë e vështirë për lojtarët dhe për të gjithë ne që jemi të përfshirë në rrafshin sportiv. Do jetë e vështirë si në aspektin fizik e teknik, por të mos harrojmë që shpejt vjen vera dhe temperaturat do të jenë shumë të larta. Pra, do jetë edhe problematika e temperaturave për stërvitshmërinë dhe për ndeshjet. Përshtatja me kohën do të jetë e vështirë, pasi në të shkuarën në fund të majit ne e kishim mbyllur kampionatin dhe prisnim vetëm finalen e Kupës së Shqipërisë.Trajneri i Skënderbeut, Ilir Daja, ka thënë se nuk mund të vazhdohet në këto kushte kur lojtarët kanë dy muaj pa stërvitje. Sipas tij, duhet të nisë kampionati në shtator, të mos bjerë as një nga ky sezon dhe të shtohet numri i ekipeve. Si ju duket kjo ide?
Unë jam i mendimit që duhet të rifillojmë duke marrë masat normale, pastaj verdiktet t?i japë fusha. Në lidhje me formulën se si duhet të jetë, e dinë organizatorët e garës. Unë personalisht gjykoj që me 10 skuadra është më e fortë gara.

Nëse merret vendim për nisjen, si do ia bëni me lojtarët që vijnë nga jashtë, që duhet të bëjë 14 ditë karantinë të detyruar?
Nëse nis gara, unë jam i mendimit se lojtarëve që do vijnë nga jashtë t?u jepet mundësia të karantinohen nga klubi në ndonjë hotel, jo të karantinohen si gjithë njerëzit e zakonshëm. Duhet t?u jepet mundësia të dalin 1 orë të bëjnë stërvitje individuale pa takuar asnjeri. Pa harruar dhe regjimin ushqimor që lojtarët profesionistë e kanë të ndryshëm nga ai i njerëzve të zakonshëm. Pra, unë gjykoj dhe u thirrje autoriteteve që futbollistët të trajtohen ndryshe sa i përket kësaj teme, pasi vetë statusi i futbollistit është i tillë, jo njësoj si i njerëzve të zakonshëm, kjo sa i përket profesionit dhe specifikave të tij.

Qeveria heziton të japë leje për stërvitje, pse mendoni se duhet të filloni në një kohë që autoritetet thonë se futbolli ka risk të lartë?
Personalisht mendoj që qeveria të na japë mundësi të fillojmë sa më shpejt me grupe të vogla. Natyrisht duke respektuar protokollet e sigurisë pastaj shikohet, me pak fjalë të ndjekim modelin e Gjermanisë.

Jeni i shqetësuar për vazhdimësinë sa i përket aspektit financiar dhe sa mund të ndikojë kjo situatë me krizën e klubeve?
Financat nuk janë kompetencë e imja, por normal që kostoja do jetë e shtuar.

Vazhdoni stërvitjen ?online?. Sa e vështirë është kjo mënyrë përditë në kushte shtëpie?
Stërvitjet ?online? vazhdojnë, por tani jemi ditaditës në pritje se çfarë do bëhet, po na duken ditët si muaj.

Realisht sa është vëmendja te kampionati në këto kushte?
Patjetër që vëmendja është e madhe se kur do fillojë kampionati, pasi ne duam të rikthehemi sa më shpejt për të luftuar për objektivat tona. Kemi shumë kohë të izoluar, intensiteti i sëmundjes ka rënë, me shumë kujdes të shtuar tashmë kërkojmë që të rinisim punën, pasi ne sportistët më shumë se kushdo tjetër nuk mund të qëndrojmë dot më në kushte shtëpie. Kemi thyer çdo rutinë tonën, kurrë nuk e kisha menduar që mund të qëndroja kaq gjatë në shtëpi, pa u stërvitur, pa stërvitur dhe pa ndeshje. Shpresoj që gjithçka të shkojë mirë dhe situata të kthehet paksa në normalitet.