E fundit!

15:45 Aktualitet

46 ditë protestë/ Mbahet sot tubimi i radhës kundër qeverisë

Pasditen e sotme në Tiranë para Kryeministrisë mbahet prot...

Eksperti i ekonomisë: Ringritja nuk do vijë e shpejtë

22 Prill 2020, 17:37, Ekonomi CNA

Eksperti i ekonomisë, Ardian Civici e ka cilësuar amnistinë fiskale si një hap pozitiv dhe një instrument që i shërben jo vetëm ekonomisë shqiptare që nga goditjet që ka pasur ka nevojë për likuiditet por dhe një hap i rëndësishëm në luftën kundër informalitetit.

Civici tha se çdo amnisti fiskale ka disa pikëpyetje të mëdha që duhen analizuar me kujdes, ndaj kërkon kohë dhe konsensus.

“Nuk besoj që kritikat e opozitës janë për kohën kur është ndërmarrë se sa për përmbajtjen. Çdo amnisti fiskale ka disa pikëpyetje të mëdha që duhen analizuar me kujdes. Kush përfiton? Nëse bëhen për grupe të vogla dhe qëllime okulte kjo amnisti fiskale nuk ka vlerë. Nga eksperienca e vendeve që i zbatojnë, në radhë të parë kërkohet konsensus i gjerë politik sepse pa konsensus të gjerë mund të jetë e njëanshme dhe kërkon konsultim dhe me grupet e interesit. Ajo që është e rëndësishme në një amnisti fiskale është numri i grupeve që marrin pjesë.

Një amnisti fiskale ka dhe pjesën tjetër të atyre që kanë qenë të rregullt. Kërkon dhe kohë, dhe konsensus. Për këtë arsye mendoj që dhe opozita kërkon fjalën e saj dhe në sensin e një marrëveshje për qëllimet dhe efektet që do ketë. Formalitetin e lufton sepse pika më delikate është ajo që quhet dita e nesërme. Në momentin që mbaron amnistia fiskale i gjithë sistemi duhet të jetë i reformuar që të mos lejojë më të ardhmen informalitet. Paketat e ndryshimeve fiskale shoqërohen me ndryshime ligjore. Nëse nuk bëhen rrezikon që pas amnistisë të ketë sërish informalitet?, u shpreh ai në një lidhje me News 24.

Për paketat e qeverisë, eksperti deklaroi se janë në nivel social, por sipas tij duhen ndihmuar me subvencione e mbështetje direkte një pjesë të bizneseve, që të paktën të mos falimentojnë. Civici theksoi se turizmi është sektori më i prekur nga virusi, pasi vonesa e hapjes së kufijve deri në shtator ose dhjetor do na dëmtojë shumë.

“Ndoshta duhet të fillojmë të nënvizojmë më shumë atë që po bëjnë vendet e tjera që ta vëmë theksin tek turizmi i brendshëm. Sektori turistik duhet të kalojë pak nga situata pesimiste por të mendojë më intensivisht për të bërë gati kapacitetet turistike për turizmin e brendshëm, potencialet e brendshme mund të jenë ndihmë që ta mbrojmë këtë sektorë në këtë situatë të vështirë. Siç po bëjnë shumë vende të tjera të konsumojmë produkte vendase?, vijoi ai.

Ndërkohë, sa i përket ekonomisë, eksperti theksoi se ringritja nuk do të jetë e shpejtë.

“Mendoj se në rastin e Shqipërisë dhe nga analizat që bëhen referuar strukturës së ekonomisë shqiptare, më e pranueshme do jetë një kurbë në formë U-je. Nëse deri në fund të qershorit shkojmë në pikën fundore të rënies do na duhen 3-4 muaj stanjacion që të nisim ngritjen. Ka pak shpresa që sektori i turizmit të mund të jetë kaq kontribues sa vitet e kaluara. Ekonomia shqiptare nga ana tjetër ka qenë shumë e varur nga investimet e huaja direkte. Kur ranë këto investime shkuam në një rritje ekonomike 2.5-2.7. Në situatën që janë vendet, e vështirë për investime të huaja. 1.2-1.3 mld euro janë nga remitancat. Në këto kushte ku janë Greqia, Italia nuk do vijnë më. Situata e ringritjes nuk do vijë aq shpejt?, deklaroi Civici./ CNA.al