"Ekonomitë tona do të goditen më rëndë"/ Majlinda Bregu: Humbjet e mëdha do jenë në turizëm

15 Prill 2020, 14:44, Ekonomi CNA

Sekretarja e Përgjithshme e Këshillit të Bashkëpunimit Rajonal, Majlinda Bregu ngriti alarmin se ekonomitë e vendeve të Ballkanit Perëndimor do të goditen edhe më rëndë.

Ajo foli për ndihmën e Bashkimit Europian, për të cilin tha se për herë të parë që nga viti 2002 i ka dhënë akses vendeve tona.

?Shqipëria pati dy ngjarje të njëpasnjëshme. Edhe nëse do të kishim qenë një vend me të ardhura më të mëdha do të ishim vënë në vështirësi. Situata me pandeminë ishte më ndryshe se ajo nga tërmeti, pasi përfshirja ishte shumë herë më e madhe. Kjo krizë do të jetë një leksion i madh edhe për BE-në. Për herë të parë nga viti 2002, i është dhënë akses vendeve të Ballkanit Perëndimor për të qenë pjesë e këtij fondi të solidaritetit, i cili është 800 milionë euro. Asnjëherë nuk është e mjaftueshme. Ekonomitë tona do të goditen më rëndë. Humbjet do të jenë të mëdha, sidomos nga turizmi?, u shpreh Bregu në një lidhje me A2.

Për lëvizjen e mallrave, ajo tregoi se nuk është shkëputur ndonëse ka pasur probleme.

?Ne nuk jemi të shkëputur. Kufijtë tanë ndahen me vende anëtare të BE-së. Situata para një muaji ishte kaotike dhe për ne ishte shumë e vështirë për të gjetur rrugë për të lehtësuar qarkullimin e mallrave. Ka pasur probleme. Ka pasur radhë 60 kilometra për 250 kilometra rrugë. Në Merdarë ka pasur problem jo vetëm me shoferët kosovarë, por edhe me ata nga vendet anëtare. Kemi pasur problem me kufizimin e orarit. U deshën dy javë përpjekje intensive dhe sot situata është normalizuar. Ne marrim informacion nga çdo vend për të parë se si lëviz ecuria. Sot flasim për një qarkullim normal. Veçanërisht, pikat e kalimit kufitar me Shqipërinë funksionojnë normalisht me rajonin?, nënvizoi sekretarja e Bashkëpunimit Rajonal./ CNA.al