"Mund të ketë lidhje të forta me politikanë"/ Artan Hoxha tregon detaje nga arrestimi i Orges Bilbilit

13 Prill 2020, 22:41, Kronika CNA

Gazetari Artan Hoxha ka treguar me detaje dinamikën e ngjarjes së pak ditëve më parë në Tiranë, ku u plagos dhe u arrestua Orges Bilbili.

Hoxha tregoi se Bilbili sapo kishte dalë nga banesa së bashku me shokun e tij Anterio Kaloshi dhe polici i kishte kërkuar të ndalonte pasi dyshoi për faktin se kishte vënë kapuç në kokë.

Ai rrëfeu se polici e ka ndaluar për të parë nëse ka leje dalje, por të dy të kërkuarit kanë tentuar të largohen në drejtime të ndryshme dhe Bilbili i ka drejtuar armën efektivit. Sipas tij, në këto kushte polici e ka qëlluar dhe më pas ka kërkuar përforcime.

“Ditën e ngjarjes Orges Bilbili, Laert Haxhiu dhe Anterio Kaloshi që njihet si autori i tretë i masakrës në Lushnje, kanë dalë të dy nga banesa që kanë pasur shumë pak kohë që e kanë marrë. Policia po i kërkonte në vend tjetër dhe janë përballur me policinë. Këta kanë dalë nga një tunel afër banesës dhe në momentin që kanë dalë në rrugë, Orges bilbili ka rënë në sy për një fakt se ai nuk ka pasur kapele por ka pasur kapuç. Thjeshtë polici ka dyshuar nga kapuçi, Bilbili ka vazhduar nga njëra anë ndërsa Anterio Kaloshi ka ikur në drejtimin tjetër. Në momentin që polici është afruar për të kërkuar lejen dhe Orges Bilbili i ka bërë të qartë të rrijë larg. Ai ka pasur një armë Bereta me fishek në gojë, në atë moment nuk e di në çfarë rrethanash i ka rënë pistoleta dhe polici i ka qëlluar. Polici ka qëlluar fillimisht në ajër. Në fakt polici po ta dinte që kishte të bënte me një person me kriminalitet kaq të lartë duhet të njoftonte dhe të kërkonte ndihmë pasi mund të ishte rrezik për kalimtarët dhe banorët e zonës duke qenë se është një zonë e banuar. Polici e ka qëlluar, predha e ka marrë diku afër mesit sepse dëmtimet Bilbili i ka marrë në pjesën e barkut dhe të zorrëve të trasha. Policia ka kërkuar ambulancën dhe forca të tjera, kur ka shkuar policia në vendin e ngjarjes është parë që personi i plagosur nuk kishte mjet identifikimi. Policia nuk dinte me kë kishte të bënte. Në ambulancë i kanë kërkuar të dinë emrin ose i kanë thënë se nuk të dërgojmë në spital dhe ai duke parë që gjendja e tij shëndetësore e tij ishte rënduar i ka thënë që jam Orges Bilbili i Lushnjes”, tha gazetari.

Hoxha deklaroi se ky grup mund të ketë lidhje të forta me policë, punonjës të drejtësisë apo edhe me politikanë.

“Policia ka gjetur një mjet identifikimi në banesë dhe armë. Bilbili ka qenë në kontroll të rreptë por ende nuk kemi një marrje në pyetje të tij. Do jetë shumë e rëndësishme nëse ai do të bashkëpunojë. Arrestimi i Bilbilit është një sukses i madh dhe për më tepër që u krye nga një polic i vetëm dhe është një goditje e madhe për këtë grup. Ky grup është goditur për herë të parë. Ky grup mund të ketë lidhje të forta edhe në polici dhe drejtësi por edhe në politikë”, nënvizoi ai./ CNA.al