Eksportuesit e prodhimeve bujqësore: Bllokimi prej rënies së konsumit, nuk ka kërkesë

13 Prill 2020, 07:42, Ekonomi CNA

Eksportet e ushqimeve sidomos prodhimeve bujqësore të stinës janë bllokuar për shkak të rënies së kërkesës në tregjet e huaja sidomos në ato të Rajonit.

Kompania Gogo Eksport, prej vitesh eksporton prodhime bujqësore në tregjet e rajonit, Serbi, Maqedoni, Bosnje etj sqaroi se, kërkesa për prodhime shqiptare ka pësuar rënie drastike.

Kushtet klimaterike e favorizojnë prodhimin dhe eksportin e hershëm të prodhimeve bujqësore sidomos në Rajon nëperiudha normale. Por këtë vit pandemia COVID -19 dhe kufizimi i lëvizjeve ka çuar në një trend tjetër konsumin dhe kërkesën. Kompania Gogo tha se klientët në Rajon nuk po kërkojnë produkte të freskëta bujqësore si kastravec, kungull dhe domate. Sipas tij, mbyllja e restoranteve është një faktor, pasi ato ishin grosistët e mëdhenj në këto furnizime.

Gogo përjashton vështirësitë në transport. Rrugët janë të hapura dhe nuk ka asnjë pengesë për qarkullimin e kamionëve, por problem madhor sipas tyre për bllokimin e eksporteve është rënia e kërkesës. Kjo krizë, sipas kompanisë së eksportit, do të sjellë një efekt negative zinxhir tek çmimet e produkteve bujqësorë dhe bizneset e lidhura më bujqësinë.

Vështirësitë në eksportet e prodhimeve bujqësore të stinës për shkak të emergjencës, që ka krijuar Covid-19 po bëjnë presion mbi çmimet e produkteve të serave, duke bërë që këto ditë shitjet të jenë nën kosto. Fermerët në zonat e prodhuese të vendit pohojnë se, edhe këtë sezon prodhimet janë me intensitet të njëjtë, madje edhe më të larta se vitet e tjera, mirëpo bllokimi i eksportit ka bërë që çmimet të jenë poshtë kostos.

Ilir Mile nga një fermer në zonën Fierit tha se çdo prodhim sere nëse shitet nga prodhuesi më pak se 40 lekë për kilogram atëherë do të përballet me humbje. Ai tha se tani, janë në prodhim intensiv kungulli dhe kastraveci, por çmimet e shitjes së tyre janë në nivele shumë të ulëta në 10 lekë me shumicë, çka po i shkakton humbje të mëdha fermerëve.

Bllokimi i eksportit sjell mbifurnizim të tregjeve në vend, teksa konsumi sipas fermerëve është i njëjtë. Kjo i ka çuar çmimet e prodhimeve shumë poshtë kostove. Mile tha se e kuptojnë emergjencën që po kalon vendi, por sektori i bujqësisë ka qenë i braktisur nga politikat mbështetëse edhe në kohë normale.

Vitin e kaluar eksportet e frutave, perimeve dhe zarzavateve shënuan rritje mbi 10 për qind. Sipas të dhënave të INSTAT mbi tregtinë e jashtme frutat dhe perimet e prodhuara në vend realizuan rreth 10,4 miliardë lekë ose 84 milionë euro vlerë shitjesh në tregjet jashtë vendit në raport me 9.5 miliardë lekë ose 77 milionë euro të realizuara gjatë vitit 2018.

Vlerën më të madhe të eksportit e shënuan zarzavatet me rreth 7.8 miliardë lekë të përfaqësuara nga rritja e kontratave me jashtë për shitjen e domates. Eksporti i zarzavateve në veçanti shënoi 7.8 miliardë lekë ose 63 milionë euro me një rritje 5,3 për qind në raport me një vit më pare.

Ndërsa eksporti i frutave në vlerë është më i vogël me vetëm 2,6 miliardë lekë, por rritja në raport me vitin 2018 ishte me lartë, me rreth 25%./Monitor