"Jemi përgatitur për disa skenare"/ Gjata: Kemi kurbë të shtypur, situata nën kontroll

8 Prill 2020, 16:22, Aktualitet CNA

Koordinatori i Task Forcës për koronavirusin dhe rektori i Universitetit të Mjekësisë, Arben Gjata, deklaroi pasditen e sotme se janë marrë të gjitha masat për mbrojtjen e personelit mjekësor, i cili është më i rrezikuar gjatë këtyre ditëve.

Gjata tha se deri më tani janë prekur 10% e mjekëve, ndërsa theksoi se fatmirësisht në stafin që është në front të parë të luftës ka shumë pak të infektuar.

“Fatmirësisht kemi shumë pak të prekur në frontin e parë të luftës në spitalin infektiv. Ndërkohë është bërë trajnim masiv në të gjithë Shqipërinë për mjekët. Është bërë trajnim me personelin primar në këtë mënyrë kur mbaroi trajnimi u futën në luftë edhe mjekët e familjes për të bërë ndjekjen e pacientëve potencialisht të infektuar. E më pas t’i rekomandojnë ata për t’ju nënshtruar testeve. Mbi 50 përqind e të prekurve kanë rezultuar negativ pas dy javësh. Faza e rikuperimit parashikon kryerjen e një tamponi tjetër pas dy javësh dhe pasi të kalojë një muaj. Kjo për të patur mundësi që të rikuperohesh plotësisht dhe të jesh në gjendje për të shkuar në punë e të mos bëhesh rrezik për të tjerët. Gjithçka varet nga grada e infeksionit”, u shpreh ai në një lidhje me Rtv Ora.

Ndërkohë për testimet që kanë hapur debat, Gjata theksoi se është ndjekur strategjia që është vendosur nga komiteti i ekspertëve shqiptarë.

“Është një shifër tjetër, nëse do të kishim një numër më të lartë të infektuarish ne nuk do të kishim kapacitet në spitalet tona. Ne jemi përgatitur për disa skenare. Tani ne jemi në skenarin e parë. Nëse do të marrim epidemitë që ka kaluar Shqipëria nga kolera apo gripi i derrit, shumica e këtyre ekspertëve janë të njëjtë. Nuk është një problem. Problemi është që testimi bëhet në rast të një ndjekje epidemiologjike, bëhen testime të kontaktit. Nisen nga disa parime epidemiologjike. Deri tani jemi në një situatë të kontrolluar. Sa më shumë presione të kenë aq më keq. Ne kemi rezultate relativisht të mira. Kemi një epidemi të kontrolluar me një kurbë të shtypur. Sa kohë ne po e përballojmë pa hyrë në kapacitetet më të mëdha, atëherë jemi nën kontroll. Në të gjithë botën ndryshohen shpeshherë ndryshojnë masat e marra nga qeveria. Kjo sepse virusi ka më shumë të panjohura se sa të njohura. Gjatë kësaj periudhe mjekët, shkencëtarët, kanë ndjekur këto ndryshime”, përfundoi koordinatori i Task Forcës./ CNA.al