Manastirliu jep lajmin/ Shtyhen masat dhe ndërhyrjet kirugjikale, njoftimi për qytetarët me ndihmë ekonomike

1 Prill 2020, 15:14, Sociale CNA

Ministrja e Shëndetësisë Ogerta Manastirliu ka dhënë një njoftim për qytetarët pak minuta më parë.

Nëpërmjet një videoje në rrjetet sociale, Manastirliu bëri me dije se do të shtyhet afati i mbylljes për të gjitha baret, restorantet apo shkollat, çerdhet dhe kopështet.

Ajo gjithashtu tha se do të shtyhen edhe ndërhyrjet kirurgjikale dhe konsultat mjekësore deri në përfundim të situatës.

“Dua të informoj qytetarët se nga sot shtyhen pa afat urdhrat për masat ndaluese me qëllim kufizimin e përhapjes së COVID-19.
Qëndrojnë të mbyllura deri në përfundimin e epidemisë çerdhet, kopshtet dhe shkollat, të gjitha institucionet arsimore publike dhe jo publike. Baret, restorantet, lokalet, fast-food-et dhe strukturat akomoduese që ofrojnë shërbim për klientët. Do të jenë të ndaluara deri në përfundimin e epidemisë aktivitetet publike dhe jo publike dhe anullimi i grumbullimeve masive në vende të mbyllura apo të hapura.
Shtyhen deri në përfundimin e kësaj situate edhe urdhrat për ndërprerjen e ndërhyrjeve kirurgjikale të planifikuara në të gjithë strukturat spitalore publike dhe jo publike”, u shpreh ajo.

Për personat me ndihmë ekonomike dhe ato me aftësi të kufizuar, tregoi se nuk përse të shkojnë të mbajnë radhë në sportele për aplikime, pasi nënvizoi se çdo gjë mund të bëhet online.

“Dua të sqaroj për qytetarët se duke filluar nga dita e sotme: Të gjithë familjet dhe indiviët që përfitojnë ndihmën ekonomike do të përfitojnë pagesën e ndihmës ekonomike pa patur nevojë që qytetarët të paraqiten për të kryer aplikimin për përfitimin e kësaj pagese, pasi ai do të jetë online. Sipas urdhërit që kam firmosur administratorët shoqërorë të njësive adminsitrave janë përgjegjës për kryerjen e aplikimeve për ndihmë ekonomike duke mundësuar ata vetë kontaktin elektronik ose me telefon për t?iu ardhur në ndihmë të gjithë aplikuesve për përfitimin e ndihmës ekonomike.
Përjashtimisht, gjatë situatës së fatkeqësisë natyrore, aplikimet për ndihmë ekonomike, do të pranohen nga administratorët shoqërorë të njësive administrative në formë elektronike ose përmes shërbimit postar. Rreth 64 mijë familje do të përfitojnë nga dyfishimi i pagesës së ndihmës ekonomike përgjatë gjithë periudhës së fatkeqësisë natyrore. Edhe për personat me aftësi të kufizuar, pagesat do të vazhdojnë pa ndërprerje dhe rikomisionimet e personave me aftësi të kufizuara do të zhvillohen pasi të kalohet gjendja e fatkeqësisë natyrore”, nënvizoi ministrja./ CNA.al