web counter
LEXO PA REKLAMA!

SHKARKO APP

App Store
Google Play

Rama shigjeton opozitën për sulmet e videos së policisë/ "Vesi i tyre do u dalë bashkë me shpirtin"

22 Mars 2020, 12:41, Politikë CNA

Kryeministri Edi Rama ka qenë i ashpër me opozitën teksa foli për sulmet e këtyre të fundit pas publikimit të videos së policisë algjeriane, e cila rrihte mbështetësit e opozitës që kishin dalë në protestë e që kreu i qeverisë na i shiti si të policisë së Spanjës që detyronte qytetarët të vetëkarantinoheshin.

Pas reagimeve të shumta të opozitarëve dhe akuzave, Rama e ka cekur sërish këtë çështje gjatë një videolive në rrjetet sociale.

Kryeministri i kërkon sërish qytetarëve falje për pasaktësinë e djeshme, ndërsa deklaron se vesi i opozitarëve do i dalë kur t’i dalë edhe shpirti.

“Dje postova një video që gabimisht një mik nga Italia më tha se ishte nga Spanja, policia reagonte për të shpërndarë njerëz. Doli se ishte nga Algjeria dhe jo nga Spanja dhe u hodhën përpjetë ata që i njihni të gjithë, e nuk dua fare të merrem se vesi i tyre do u dalë bashkë me shpirtin e s’ka fjalë, s’ka logjikë, s’ka kohë të vështirë që atyre u bën derman. Ju kërkova ndjesë dje ju të gjithëve për pasaktësinë, por jo për mesazhin e atyre pamjeve, gabimi është pjesë e jetës, është pjesë e punës sonë, por rëndësi ka të mos gabojmë me qëllim dhe të kërkojmë ndjesë kur gabojmë.

Më falni edhe njëherë që rashë dhe unë pre njëherë e qytetarit dixhital që në këtë rast ishte krejt i pafajshëm dhe në këtë periudhë të jashtëzakonshme pune e lajmesh unë nuk bëra siç bëj gjithmonë verifikimin e një burimi, por ama qëllimi i postimit të asaj videoje nuk ndryshon dhe nesër e më tej forcat tona të rendit nuk do tolerojnë askënd që nuk do që ta kuptojë se grumbullimet pa rregull dhe radha distancash nëpër tregje, nëpër dyqane dhe xhirot nëpër rrugë janë të paligjshme, janë të rrezikshme dhe janë të patolerueshme në këtë luftë”, deklaron kreu i qeverisë./ CNA.al





Lajmet e fundit nga