E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

"Stop mallkimit të njëri-tjetrit!"/ Sonila Meço: Koha për Komitet Shpëtimi, duhet një plan

21 Mars 2020, 15:22, Politikë CNA

Gazetarja dhe moderatorja e njohur Sonila Meço ka bërë thirrje të forta për qytetarët në këto ditë të vështira për shkak të situatës së krijuar nga koronavirusi.
Meço thotë se përdorimi i fashave orare për të kryer pagesa, blerje të domosdoshme, apo të tjera veprime nëpër zyra shtetërore po ngjan i pamundur të shmangë distancimin social.
Sipas saj, nuk po mjafton apelimi, ndërsa përshkallëzimi i situatës krijon panik të tepërt, ndaj thekson se qytetarët duhet të kuptojnë disa gjëra.
“1. Nuk ka zgjidhje tjetër veç vetizolimit në shtëpi. Është shpëtimi për veten, të dashurin, të afërmin. Përndryshe na pret skenari tragjik italian, të cilin me një klikim në faqet online të shtypit italian a transmetimet televizive atje mund ta mësoni. Detyrë e medias të pasqyrojë situatën.
2. Furnizimi me ushqime vijon e do të vijojë normalisht në markete e dyqane. Nuk do të ndërpritet zinxhiri ekonomik, që garanton jetesën. Pra e kotë të dyndesh, sepse raftet do të jenë plot. Këtë qeveria duhet ta bëjë me komunikime të rregullta, si ato për larjen e duarve. T?i thuhet troç shqiptarit se ka ushqim e mjete të domosdoshme mjaftueshëm.
3. Të jetë vetëm një pjestar familjeje, që me autorizim përkatës të bëjë blerjet një herë në katër ditë. Jemi në luftë, nuk mund të ruajmë rituale e menu ditësh festash. Detyrë e qeverisë dhe autoriteteve të ndërtojnë këtë lloj grafiku, duke shmangur fashat orare të përgjithshme.
4. Ushtria të vihet në dispozicion të policisë për të shmangur çdo grumbullim, që nuk respekton distancat, ku njerezit janë pa mjetet mbrojtëse, maska, doreza e dezinfektant. Detyrë e qeverisë dhe autoriteteve të ndërtojnë mbulimin e territorit. Detyrë e mediave ta kujtojnë çdo orë me shpjegimet përkatëse.
5. Askush të mos largohet nga shtëpia më shumë se 200m, as për të shëtitur qenin. Në rast emergjence funksionojnë numrat përkatës. Autoritetet komunikojnë rregullisht duke vënë në lëvizje drejtuesit lokalë deri në qelizë të funksionimit. Pallate e apartamente. Në fushata elektorale dimë edhe çfarë hanë banorët e zonave të ndryshme, na mësojnë edhe pemën gjenealogjike. Le të vlejë kjo përvojë për identifikimin e shtresave prioritare, banorëve të moshuar, atyre me probleme.
6. Pagesat jashtë vendit kryen online. Të ndërtohen grafikë të detajuar për të siguruar pagesat mujore. Me autorizim specifik ato që janë emergjente a ditore”, shkruan ajo në rrjetet sociale.
Gazetarja deklaron se për të dalë nga kjo situatë duhet sakrificë, por edhe plan, ndërsa pretendon se fashat orare shoqëruar me shtrëngime ekstreme nuk prodhojnë efikasitet, por bëhen kundërproduktive.
Ajo i kërkon autoriteteve të mbledhë koka të mençura të organizimit, të ngrejë një komitet ad hoc për ndërtimin e një strategjie të organizimit të jetës në kushte lufte.
“E kotë të humbasim energji me mallkime e shfryrje mbi njerëz që dynden rrugëve. Është koha për të vepruar me organizim, plan e strategji të fortë duke ndërtuar Komitet Shpëtimi. Të gjithë bashkë publik, mendje të ndritura, shkencëtarë, ekspertë, të çdo bindjeje e formacioni politik. Mallkimi e shtrëngimi pa strategji e organizim janë virus mbi virusin. Popull qëndro në shtëpi! Qeveri mblidh Komitetin e Mendjeve të Ndritura! Pash Zotin!”, thekson ajo./ CNA.al