Nga Armir Shkurti/ Pushteti, Edi dhe terrori i COVID-19

15 Mars 2020, 11:29, Opinione CNA

Në 2004 Sekretari i Përgjithshëm i OKB- së Kofi Anan e ka përshkruar terrorizmin si akt ” me qëllim shkaktimin e vdekjes apo dëmtimeve trupore ndaj civilëve me synim frikësimin e popullatës ose shtrëngimin e një qeverie a organizate ndërkombëtare për të bërë a hequr dorë nga ndonjë veprim”. Ende nuk ka një formulim të prerë për këtë krim në fakt. Sidoqoftë qëllimi është politik dhe mjeti për ta arritur është frika dhe paniku në popullatë.

Për fat të keq globi sot po jeton një skenar identik me atë të një sulmi të këtij lloji. Niveli i frikës, panikut dhe pasigurisë është si kurrë më parë, i përbotshëm. Terroristë nuk ka (edhe pse kjo situatë u ka dhënë liri të plotë teorive konspiracioniste nga më të habitshmet) por ka terror. Ajo sjellje është. Krahas vdekjes që na vërtitet si ruleta ruse vuajtjeve nga polmoniti, jeta tani është karantinë, qepena ulur, policë, ushtarë, sirena, postblloqe, urdhëresa, gjoba, ndëshkime…

Kryeministri ka marrë përsipër të na shpëtojë jetën, pa na thënë si do ta vazhdojmë atë pa punë e pa para. Por sidoqoftë, kohë të jashtëzakonshme masa të jashtëzakonshme….

….nëse këto kohë e masa nuk do ti përdorte për politikat e tij!

A mundet në këtë emergjencë botërore të heqësh nga vija e parë e frontit mjekun që përballet drejtpërdrejt me epideminë? Mjeku i urgjencës së QSUT, Ilir Allkja njoftoi mbrëmë se i kanë komunikuar largimin nga puna. Pa motivacion! …Por që në të vërtetë ka goxha motiv: Më 11 mars ky mjek deklaroi se eprorët i kanë çuar si cjapi te kasapi nëpër të dyshuar me covid-19, pa u thënë paraprakisht se për çfarë bëhej fjalë. Kjo e trazoi Ramën, i cili nuk ia përtoi të dalë në ekran me fotot e facebookut të mjekut që pozonte me dy gishtat lart. Dhe mbrëmë mjekun e kanë shkarkuar!

Dje “qendra” njoftoi se do të mobilizohen studentë dhe mjekë në pension. Sepse në gjithë botën në fakt ky është problemi: mungesa e personelit për të përballuar shpërthimin masiv të sëmundjes. Sistemi ynë e shkarkon mjekun e vijës së parë në kulm të betejës? Për motive politike – siç deklaron vetë Allkja.

Vetë kryeministri këtë situatë e ka quajtur “luftë” dhe virusin “armik”. Por dje “gjenerali” ka hequr nga fronti një “oficer artilerie”, ndërkohë që në “front” mungojnë qindra forca të dobishme, mjekë, infermierë, laborantë që sot punojnë kryesisht në Gjermani. Mes ndëshkimit të një kundërshtari apo bashkëpunimit në emër të jetës së njerëzve, kryeministri zgjedh të parën. Në kushtet e terrorit nga pandemia le të mësojnë shqiptarët se, sado i doboshëm për vendin të jeshë, nëse nuk je ushtar i Edit je i mbaruar! Kur në kushtet e terrorit dhe panikut jep mesazhin se “kushdoqofsh, në je kundër meje do ikësh ti!” s’është tjetër veç përdorim i kësaj gjendjeje për politikë. Për të forcuar pushtetin personal dhe mbytur , me çdo çmim, çdo zë kundër.