Edi Paloka pranon dështimin e Lulzim Bashës

12 Shkurt 2020, 10:43, Politikë CNA

Më në fund duket se është kthjelluar dhe është më i qartë dhe Edi Paloka, një nga flakadanët mbështetës të Lulzim Bashës, një militant më shumë i PD-së, njeriu i cili ka qëndruar në krah të Lulit që ditën e parë që ky i fundit ka marë drejtimin e opozitës.

Por, Basha Palokën më shumë e ka dashur në sfond si një instrument për të treguar se PD-ja nuk është ndarë nga e vjetra dhe militantët i ka ruajtur, pavarësisht gjithçaje çfarë ka ndodhur.

Pra, Paloka dhe Spaho ka qenë një fasadë e Lulzim Bashës dhe një fasadë e përdorur shumë mirë nga ai.

Paloka për një karige të nënkryetarit të Kuvendit apo kryetarit të grupit parlamentar bëri gjithçka, megjithëse gjatë kohës së Berishës maksimumi i tij ishte thjeshtë një zëdhënës.

Gjithsesi, më në fund dhe ky i fundit është kthjelluar, dje ka pranuar publikisht se Lulzim Basha ka dështuar. Po këtë e ka konfirmuar vetë në studio televizive gjatë një debati me Ylli Rakipin.

Paloka ka pranuar se janë 80% e shqiptarëve kundër Edi Ramës dhe Edi Rama nuk bie dhe për këtë thekson se kjo nuk është vetëm çështje e opozitës dhe duhet gjetur zgjidhje.

Pra, nënkryetari i PD-së pranon dështimin e Republikës së Re dhe Lulzim Bashës, pranon dhe faktin e paaftësisë që ka kjo opozitë për të shembur kryeministrin. Megjithëse në fjalitë e tij ai thekson faktin se opozita nuk mund të marë armët, por është prap ky njeri, Edi Paloka apo vetë Lulzim Basha kërcënonin, sulmonin institucionet, digjnin mandatet dhe falnin një mazhorancë kushtetuese Edi Ramës, por sot ka ndryshuar qëndrim.

Në fakt Paloka ka thënë një të vërtetë, që shumica e shqiptarëve janë kundër Edi Ramës, por që shqiptarët nuk po bashkohen me Lulzim Bashën për të rëzuar kryeministrin. Pra, fakti qëndron se shumica është kundër Ramës, por kjo shumicë nuk bashkohet me Lulzim Bashën, këtë e ka pranuar edhe Edi Paloka.

Nga ana tjetër ai qahet se duhet gjetur zgjidhja se si ta rrëzojmë Ramën, pasi kjo nuk është çështje vetëm e opozitës, në fakt është çështje vetëm dhe vetëm e opozitës. Është opozita ajo që duhet të mbledhë të gjitha flukset qytetare, të gjithë urrejtjen kundër Ramës, ta shkarkojë te qeveria dhe më pas ta detyrojë atë të japë dorëheqjen, por e provoi me të gjitha mënyrat dhe qytetarët nuk i shkuan të gjithë nga pas sepse ata nuk besojnë të Lulzim Basha.

Mund ta urrejnë Edi Ramën, mund të duan të mos e shohin me sy Edi Ramën, mund të mos kenë asnjë besim te qeveria, por shikojnë Lulzim Bashën dhe iu vjen për të vjellë nga Luli dhe ata që ka pasur Luli.

Për shkak se të gjithë janë kundër këtij kryeministri, por neveriten nga alternativa që kanë përballë, një ish-ministër i korruptuar dhe akuzuar, një kryetar bashkie i dështuar, një njeri që mori drejtimin e opozitës dhe Partisë Demokratike duke deformuar dhe duke kthyer në Republikën e Re të mbushur me servila dhe të paaftë, një njeri i cili u shit dhe u ble si mall në tregun çam nga Edi Rama, njeriu që tradhtoi shqiptarët dhe demokratët në kauzat e tyre, duke i torturuar në çadër dhe protesta, në finale qëllimi i vetëm ishin milionat e eurove për familjarët e tij, vilat e lluksit dhe milionat për tenderat e kompanive afër tij.

Prandaj dhe shqiptarët e neverisin Lulzim Bashën dhe 80% e tyre nuk bashkohen me të kundër Edi Ramës. Shqiptarët janë kundër Edi Ramës po aq sa janë dhe kundër Lulzim Bashës.

Prandaj dhe Edi Paloka të mos lodhet shumë, konstatimet i ka të sakta, dështimin e Lulzim Bashës e ka pranuar, por zgjidhjen nuk mund ta gjejë te qytetarët, zgjidhjen e ka në në selinë e Partisë Demokratike, me largimin e Lulzim Bashës, po qe nevoja edhe me largimin e Edi Palokës dhe shumë figurave të kosumuara politike në atë parti, ndryshe opozita do të jetë e gjatë, pasi njerëzit mund të jenë në shumicë kundër Edi Ramës, por në shumicë janë dhe kundër Lulzim Bashës./ CNA.al