Trajnimi i audituesve të KLSH-së/ Leskaj takon drejtorin e Planifikimit Strategjik në SHBA

6 Shkurt 2020, 16:52, Aktualitet CNA

Kryetari i KLSH-së Bujar Leskaj dhe Drejtori i Përgjithshëm i këtij institucioni Rinald Muça, vizituan Zyrën e Llogaridhënies Qeveritare në SHBA (GAO).

Qëllimi i vizitës ishte diskutimi mbi bashkëpunimin gjatë 6 viteve të fundit, me fokus vijimin e trajnimeve periodike të audituesve të KLSH-së në programin e fellowship-it amerikan, njohja me dy botimet me të fundit të KLSh-së mbi GAO-n, respektivisht “GAO, NIK dhe leksionet e Dodaros” dhe “GAO, lideri i INTOSAI-t (dokumente pune)”, prezantimi tek kolegët amerikanë i punës dhe progresit të KLSh-së në auditimet e performancës, specifikisht mbi rezultatet e auditimit të performancës mbi teknologjinë 5G, çështje për të cilën drejtuesit e KLSH-së morën pjesë edhe në forumin e Cyber Security organizuar në Senat në datën 3 shkurt.

GAO u përfaqësua në këtë takim nga James-Christian Blockwood, Drejtor i Planifikimit Strategjik dhe Koordinator i Jashtëm, Chuck Young, Drejtor i Marrëdhënieve me Jashtë, Tim Bowling, Drejtor i Garantimit të Cilësisë, Mike Hix, Drejtor i Marrëdhënieve Ndërkombëtare, Mark Keenan dhe Brenda Fernandez, menaxhere të Programit të Fellowship-it dhe Janet St Laurent, Drejtoreshë e Qendrës së Ekselencës.

Takim i Kryetarit të KLSH-së, Bujar Leskaj me James-Christian Blockwood, Drejtor i Planifikimit Strategjik dhe Koordinator i Jashtëm, GAO. Washington D.C, 5 shkurt 2020.

Në fjalën e tij, Leskaj u ndal në rolin e madh që GAO dhe veçanërisht Gene Dodaro ka luajtur për komunitetin INTOSAI dhe specifikisht për Shqipërinë. Dy botimet që iu përcollën zyrtarisht palës amerikane ishin shprehje të mirënjohjes, vlerësimit dhe aplikimit në praktikë të motos së INTOSAI-t që KLSH dhe Shqipëria kanë ndaj partnerit tonë historik dhe strategjik. Kolegët amerikane, pasi u njohën me përmbledhjen në anglisht të botimeve dhe veçanërisht të botimit të Leskaj “GAO, NIK dhe leksionet e Dodaros”, falenderuan stafin e KLSH-së dhe Leskaj për këtë vlerësim unik, që vjen në vazhdën e botimeve të vazhdueshme që KLSH ka bërë dhe do vazhdojë të bëjë për GAO-n. Më pas, Leskaj bëri një përmbledhje të performancës institucionale në shifra dhe fakte, duke dhënë dinamikën ndër vite.

Muça bëri më pas një rezyme të punës së departamentit të auditimit të performances, sfidat e kaluara dhe të ardhshme, si edhe fushat ku amerikanët mund të na ndihmojnë me mirë në përmbushjen e misionit tonë si shërbestarë të qytetarëve. Kolegët amerikane shprehen mbështetjen e tyre të palëkundur për KLSH-në dhe stafin auditues, ndanë eksperiencën e tyre në impaktimin e raporteve audituese tek palët e interesit, si edhe përkushtimin për të asistuar me trajnime afatgjata audituesit e rinj.

Takimi u realizua në një frymë të ngrohtë dhe tejet miqësore ku kolegët në GAO, pas kërkesave të Kryetarit të KLSH-së, premtuan dërgimin e lektorëve profesionistë drejt KLSH-së dhe pranimin e audituesve për trajnim në GAO.