Nga tërmeti te integrimi i Shqipërisë dhe njohja e Kosovës/ Meta intervistë për median izraelite

25 Janar 2020, 15:50, Politikë CNA

Presidenti Ilir Meta ka dhënë një intervistë për ?The Times of Israel? në Jeruzalem, ku ka folur për hapjen e negociatave, tërmetin e 26 nëntorit dhe veçanërisht njohjen e Kosovës.

Gazeta e nis shkrimin me 75-vjetorin e çlirimit të Aushvicit, i cili bashkoi në ceremoni drejtuesit e 49 vendeve, përfshirë edhe Metën.

Kreu i Shtetit shprehu solidaritetin me ata që vuajtën shumë dhe humbën jetën gjatë Holokaustit.

?Ne gjithashtu duam të nderojmë të mbijetuarit që dëshmuan këtë gjenocid, dhe t?i dërgojmë një mesazh të qartë kujtdo që promovon përjashtimin, urrejtjen dhe dhunën se antisemitizmi nuk ka vend në shoqëritë tona. Në këtë Forum unë përfaqësoja Shqipërinë, e cila ishte unike jo vetëm për mbrojtjen dhe shpëtimin e të gjithë hebrenjve të saj, por edhe për mbrojtjen e mijëra hebrenjve të tjerë që erdhën në Shqipëri nga vende të ndryshme për të mos u shfarosur?, u shpreh presidenti.

Meta foli edhe për hebrenjtë, të cilët u strehuan falë myslimanëve dhe të krishterëve shqiptarë nga pushtimi nazist.

?Ishte detyrimi ynë për ta bërë këtë. Por ne shpresojmë që kjo lidhje e madhe midis kombeve tona do të rezultojë në një marrëdhënie më produktive për të ardhmen. Ne mund të mësojmë shumë nga Izraeli dhe gjithashtu të jemi partnerë shumë efektivë, veçanërisht në çështjet e sigurisë, sepse përballemi me kërcënime si terrorizmi dhe ekstremizmi i dhunshëm?, tha Presidenti Meta.

Kreu i Shtetit tregoi pasojat e tërmetit dhe përpjekjet për rimëkëmbjen e vendit.

?Ka pasur dëme të mëdha, dhe për fat të keq patëm 51 jetë të humbura gjatë kësaj tragjedie,? tha Meta. ?Por ne jemi të vendosur për t?u përballur me këtë krizë humanitare dhe kemi dhënë ndihmë për të gjithë njerëzit që vuajtën gjatë këtij tërmeti.? Presidenti theksoi se do të rregullohet buxheti i vendit në përputhje me rrethanat.

?Ne jemi shumë të vendosur për t?u anëtarësuar në BE?, deklaroi Meta, teksa u pyet për negociatat. ?Është e vërtetë që Presidenti Macron ka kërkuar të rishikojë metodologjinë e zgjerimit të BE-së, dhe shpresojmë që kjo metodologji të rishqyrtohet shumë shpejt. Unë fola me të nëntorin e kaluar kur isha në Paris. Ne jemi në kontakt me BE-në dhe shpresojmë që së shpejti do t?i hapë rrugë vendimeve pozitive për Shqipërinë dhe Maqedoninë e Veriut?, nënvizoi ai.

Ndër të tjera, Meta u ndal edhe te pavarësia e Kosovës dhe kërkoi që Izraeli ta njohë si shtet.

?Kosova dhe Izraeli kanë një miqësi të madhe. Ne dëshirojmë dhe shpresojmë që Izraeli ta njohë pavarësinë e Kosovës sa më shpejt të jetë e mundur. Unë nuk mund të flas në emër të secilit vend, por ka simpati të madhe midis kosovarëve për hebrenjtë, dhe anasjelltas. Shpresoj se do të vijë koha. Deri atëherë, të gjitha mundësitë për bashkëpunim dhe zhvillim dypalësh duhet të shfrytëzohen?, përfundoi Presidenti./ CNA.al