E fundit!

12:07 Opinione Ardi Stefa

Ndryshimi mund të presë edhe pak...

Paraqitja e fytyrave të reja në politikë është gjithmonë l...

“Të gjithë bashkë për të ndihmuar”/ Vijon solidariteti me Shqipërinë

30 Nëntor 2019, 07:37, Sociale CNA

Tërmeti i 26 nëntorit, i cili la pas një situatë katastrofale me 50 viktima, qindra të lënduar dhe mijëra të pastrehë, ka nxjerrë në pah edhe solidaritetin që ka populli shqiptar, kur dikush ka nevojë.

Prej katër ditësh, shqiptarët kanë treguar zemrën bujare që kanë me ata që kanë nevojë për ndihmë në ditë të vështira. Por, jo vetëm shqiptarët janë bashkuar me dhimbjen e të prekurve nga tërmeti. Vendet e rajonit, të Europës e deri edhe të Izraelit i janë gjendur pranë Shqipërisë në këto ditë të vështira.

Forcat e ushtrisë dhe emergjencës civile shqiptare, forcat speciale të Kosovës, grupet e shpëtimit, zjarrfikësit-heronjë të heshtur nga vendet partnere si Italia, Franca dhe gjithë vendet e Ballkanit e deri nga Izraeli, u bënë bashkë për t?i ardhur në ndihmë të mbeturve nën rrënoja, të plagosurve, traumatizuarve dhe atyre nën qiell e pa çati, pas tërmetit vrastar.

Tragjedia e 26 nëntorit, e cila do të mbetet e rrënjosur në memorien tonë, vazhdon të nxjerrë në pah frymën e jashtëzakonshme të solidaritetit nga shumë shtete, individë dhe organizata.

Kur kanë kaluar 4 ditë nga tërmeti tragjik, qindra familje vijojnë të mos kthehen në banesat e tyre, për shkak të dëmeve të mëdha që kanë pësuar por edhe nga frika për ndonjë lëkundje tjetër.

Ndërkohë në Shqipëri për të filluar punën për vlerësimin e dëmeve të shkaktuar nga ky tërmet kanë ardhur grupe eskpertësh nga Greqia, Franca dhe Italia. Po kështu sot dhe nesër pritet që të mbërrijnë edhe grupe inspektorësh nga vende të tjera.

Sipas ministrisë së Mbrojtjes deri më tani afërsisht janë 4 mijë familje që e kalojnë natën jashtë për shkak të dëmeve nga tërmeti. Dy zonat më të prekura nga tërmeti i së martës janë Durrësi dhe Thumana, por dëme ka patur edhe në zonat përreth këtyre qyteteve përfshi edhe kryeqytetin. Në Tiranë 1192 banesa kanë dëmtime serioze dhe tani 265 pallate kërkojnë vlerësim. Po ashtu janë edhe 8 shkolla të dëmtuara, si dhe një qendër shëndetësore./ CNA.al